Авлигатай тэмцэх газрын дэд дарга Б.Хурцыг Тагнуулын Ерөнхий газрын даргаар томилсон. Түүнээс хойш АТГ-ын дэд даргын суудал эзэнгүй байгаа гэж хэлж болно.
Тэгвэл энэ албан тушаалд Монгол Улсын Ерөнхийлөгч Ц.Элбэгдорж Ц.Нямдоржийг томилуулах саналыг УИХ-д өргөн барьсан байна. Ц.Нямдорж нь 2013 онд АТГ-ын Гүйцэтгэх албаны даргаар томилогдсон бөгөөд өмнө нь тус албаны төсгийн даргаар ажиллаж байсан юм.
Авлигын эсрэг хуульд “АТГ-ын дэд даргад нэр дэвшигч нь төрийн албанд 10-аас доошгүй жил ажилласан, эрх зүйч мэргэжилтэй, гүйцэтгэх болон мөрдөн байцаах ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй иргэн байх ёстой” гэж заасан байдаг. Харин Ц.Нямдоржийн хувьд дээрх шалгуурыг хангасан гэж Ерөнхийлөгчийн зүгээс үзжээ.