Амар хялбар өвчин гэж энэ ертөнцөд байхгүй л дээ. Гэхдээ астматай хүнийг өвчин нь сэдэрсэн нөхцөлд эмчийн хатуу хяналтад байлгадаг. Ухаандаа, түргэн тусламж дуудахад хэдхэн минутын дараа маналзаад ирнэ. Монголд өнөөдөр харшилгүй хүн гэж бараг л үгүй болжээ. Хүнд хөнгөнөөсөө хамаарахаас, ямар нэгэн харшил дийлэнх иргэдэд байна. Хөдөөнөөс суурин иргэншил рүү шилжиж байгаа орны иргэд ихэвчлэн харшил, улмаар астматай болдог судалгааг Дэлхийн эрүүл мэндийн байгууллагаас гаргасан байна лээ. Элдэв янзын ногоо, шарилжны тоосонцроос харшил авч даруйхан эмчлүүлэхгүй, сорил тавиулж шинжлүүлэхгүй бол астма бронхит болдог.
Ийм аюулд айраг, архи, пиво зэрэг согтууруулах ундаа, үзэм, өргөст хэмх, тарвас, халуун ногоо нөлөөлдөг. Хэрвээ та нэгэнт астматай болсон бол харшлын өвчин ид сэдрэх долдугаар сарын сүүлээс есдүгээр сарын эх хүртэлх хугацаанд хөдөө гадаа явахгүй байх нь чухал. Ялангуяа адууны хөлс тоостой орчинд очих, айраг уухгүй байхыг эмч нар зөвлөдөг. Хоолой бачуураад эхлэх үед шууд дексаметазон тариа дуслаар хийхийг эмч нар таашаадаггүй. Учир нь бөөр, зүрхэнд муугаар нөлөөлнө гэж үздэг юм билээ. Аргагүй болсон нөхцөлд хийж, хоолойныхоо бачуурлыг тавиулах нь мэдээж.
Харин астмын өвчлөлийг намдаах мэргэшсэн газар нь “Астма” эмнэлэг гэдгийг мэдэхэд илүүдэхгүй болов уу. Уг эмнэлэгт долдугаар сарын эхээр харшлын эмчилгээ хийлгэхэд найм, есдүгээр сард астма болох аюул нүүрлэхгүй. Харин астма хүндэрсэн нөхцөлд seroflo, medrol, montair-1 эмүүдийг эмчийн зааврын дагуу ууж, хамар битүүрсэн үед nasal spray, авамис цацлагуудыг хэрэглэхэд үр дүнтэй байдаг.
Ө.Манлай