Монголын чөлөөт бөхийн холбооны ерөнхийлөгч Д.Дагвадоржийн нэрэмжит “Асашёорюү кап” өсвөрийн чөлөөт бөхийн олон улсын тэмцээн манай улсад анх удаа болох гэж байна. Өнөөдөр буюу тавдугаар сарын 25-ны өдрөөс эхлэн 30-ныг дуустал Буянт-Ухаа спортын ордонд болох энэ тэмцээнд Монгол, ОХУ, БНХАУ, Казакстан зэрэг орны өсвөрийн тамирчид оролцож байгаа юм.
Өнөөдрийн байдлаар Хятадаас бусад орны тамирчид манай улсад бэлтгэлээ базааж байна. Энэ удаагийн тэмцээн “Хүүхдийн баяр, бөхийн баяр” уриан дор болж байгаа бөгөөд түрүүлсэн бөхөд байлсан шагнал нь 500 америк доллар юм. Гэвч тэмцээний мандатын хураамж 60 мянган төгрөгийн үнэтэй байгаа нь эцэг эхчүүдийн гомдол, уур бухимдлыг дагуулж байна. Ийм өндөр үнэтэй мандатыг холбогдох хүн нь тайлбарлахдаа “Нэгэнт олон улсын шинж чанартай учир олон улсын жишгийг дагаж байна, энэ бол ДБНХолбооны дүрэм” гэв. Өсвөрийн тамирчдын олон улсын тэмцээний хураамж ойролцоогоор 30 швейцарь франк байдаг байна.
Мөн “Асашёорюү кап”-ын шагналын медалийг Япон улсад захиалгаар хийлгүүлсэн бөгөөд тэмцээний бүх зардлыг Асашёорюү сан гаргажээ.
