Тайванийн орчимд хурцадмал байдлыг нэмэгдүүлэхгүйн тулд АНУ Minuteman III тив алгасах баллистик пуужин туршихаа хойшлуулжээ. Энэ талаар Цагаан ордон мэдэгдсэнийг NBC дамжуулсан байна.
АНУ-ын Зэвсэгт хүчний зэвсэглэл дэх гол пуужин болох, цөмийн зэвсэг тээвэрлэх чадвартай Minuteman III пуужинг хэзээ турших талаар албаныхан тодорхой мэдээлэл өгөөгүй аж.
Энд дуулгахад, Хятадын Ардын чөлөөлөх арми наймдугаар сарын дөрөвний өдөр арлын орчимд Дунфэн /DF/ цувралын 11 пуужин хөөргөсөн. Энэ нь Тайванийн дээгүүр пуужин харваж байгаа анхны тохиолдол юм. БНХАУ ийнхүү Тайванийн орчимд сургуулилалт хийх болсон АНУ-ын Конгрессын Төлөөлөгчдийн танхимын тэргүүн Нэнси Пелосигийн айлчлалтай холбоотой. Пелоси БНХАУ-ын эсэргүүцлийг үл тоон Тайваньд айлчилснаар Хятадын эрх баригчид наймдугаар сарын 4-7-ны өдрүүдэд цэргийн сургуулилалт хийхээр болсон юм.