Хэдхэн хормын өмнө АНУ-ын Ерөнхийлөгчөөр Бүгд Найрамдах намаас нэр дэвшигч Дональд Трамп сонгогдлоо. Дэлхийн хамгийн нөлөө бүхий их гүрний Ерөнхийлөгчийн сонгуулийн үр дүнгийн талаар манай улсын Ерөнхийлөгч Ц.Элбэгдорж сэтгэгдлээ илэрхийлжээ.
Тэрбээр өөрийн твиттер хуудсанд “Дөнгөж сая Хиллари Клинтон Дональд Трамп руу утасдаж сонгуулийн дүнг зөвшөөрчээ. Үндэснийхээ эрх ашиг, хийж бүтээхийн талд сонгогчид нь зогсов” хэмээсэн байна.
Мөн АНУ-аас ОХУ-д Онц бөгөөд Бүрэн эрхт Элчин сайдаар ажиллаж байсан Майкл Макфол өөрийн твиттер хуудаснаа ингэж жиргэжээ. Тэрээр энэхүү сонгуульд ОХУ-ын Ерөнхийлөгч В.Путин нөлөөлсөн гээд “Путин манай сонгуульд гараа сунгаж өөрийн хүнээ АНУ-ын төрийн тэргүүн болголоо”гэжээ. Сануулахад Дональд Трамп ялалт байгуулбал Ерөнхийлөгчийн тангараг өргөхөөсөө өмнө Путинтай уулзана гэж мэдэгдэж байсан билээ. 
О.ӨНӨР