Өмнөх жилүүдтэй харьцуулахад Антарктидын озоны цоорол багассаныг эрдэмтэд тогтоожээ.
NASA болон Агаар мандлын судалгааны хүрээлэнгийн судлаачид өнгөрсөн оны аравдугаар сард Антарктидын озоны цоорлын нийт талбайн хэмжээг ойролцоогоор 23.2 сая км2 гэж тооцоолжээ. Энэ нь өмнөх онтой харьцуулахад буурсан үзүүлэлт юм. NASA-гийн мэдээлснээр сүүлийн 20-иод жил озоны цоорол буурсан үзүүлэлттэй байна гэв. Добсоны гэх спектрофотометрийг ашиглан озоны цоорлын хэмжээг тогтоох бөгөөд агаар мандлын босоо баганад озоны агуулгыг тооцоолдог.
Озоны давхарга нь дэлхийг нарны хэт ягаан туяанаас хамгаалдаг. Мөн түүнчлэн озоны хийн нягтрал маш бага хэсгийг “озоны цоорол” хэмээн нэрийддэг. Эрдэмтэд анх 1974 онд нарны гэрэл, хлор эсвэл бромын агуулгатай бодисууд нэгдэж, озоны цоорол үүсгэдэг гэдгийг тогтоож байсан бол 1985 онд Антарктидын озоны цоорлыг илрүүлсэн юм. 1987 оны Монреалын протоколын дагуу дэлхийн улс орнууд хлор болон фторын хэрэглээг хязгаарлах болсон.
Тус цоорол нь үзүүлэлтийн хувьд багасах, битүүрэх, томрох боломжтой. Тухайлбал 2020 оны тавдугаар сард Антарктидын цооролд битүүрсэн үзүүлэлттэй байсан бол тун удалгүй цоорол дахин үүсжээ.