Өнгөрөгч амралтын
өдрүүдээр Сонгинохайрхан дүүргийн 119 дүгээр цэцэрлэгийн багш О.Цэцгээ ангид нь
элсэн орсон хоёр настай хүүхдийг зодсон талаарх мэдээлэл цахим ертөнцөд багагүй
шуугиан дэгдээсэн. Багшдаа зодуулсан гэх хүүхдийн хөхөрсөн нуруу, гар болон
хумсны сорви бүхий хүзүүний зураг цэцэрлэгийн багшийнх нь харгис, балмад
үйлдлийг шүүмжилсэн сэтгэгдлүүдийн хамт фейсбүүк хуудаснаа богино хугацаанд
олон хүнд хүрсэн. “Есдүгээр сарын 1-нд манай найзын хүүхдийн бугалга хэсэг
хөхөрсөн гэртээ ирсэн бол есдүгээр сарын 2-нд чихнийх нь ард хэсгийг урсан
байсан гэнэ. Гэтэл өчигдөр (есдүгээр сарын 3-нд) гуяны дотор тал, гэдэс, нуруу
нь хөхөрсөн, чихэн дээрээ хумсны сорви болсон байна гээд ангийн багшид нь хэлэхэд
хандив өгч ороогүй юм байж битгий олон юм яриад бай. Агуулж хадгалж байгаад
баярлаж яв гэсэн байна. Цэцэрлэгийнх нь арга зүйчид хэлэхэд хүүхдээ аваад зайл
гэжээ …” хэмээн охины ээжийнх нь найз өөрийн фейсбүүк хуудаснаа бичжээ. Уг
мэдээллийн мөрөөр нийслэлийн боловсролын газраас тус цэцэрлэгт шалгалт хийхээр
болсон байна.
Болсон явдлын
талаар тодруулахаар өчигдөр 119 дүгээр цэцэрлэг дээр очсон юм. Зодуулсан гэх
охиныг Н.Нандин-Эрдэнэ гэдэг бөгөөд тус цэцэрлэгийн О.Цэцгээ багштай бага “А”
хэмээх бүлэгт хэдхэн хоногийн өмнө элсэн оржээ. Биднийг тус анги руу орох үед
О.Цэцгээ туслах багш П.Эрхэмболорын хамт хүүхдүүдэд өдрийн хоолыг нь өгч байсан
юм. О.Цэцгээ “Би энэ цэцэрлэгт сүүлийн 30 гаруй жил багшилж байна. Өнгөрсөн
хугацаанд ганц би бүү хэл манай цэцэрлэгийн хэмжээнд иймэрхүү асуудал огт гарч
байгаагүй. Энэ удаагийн үүсээд байгаа асуудал ч цахим ертөнцөд цацагдаж, хэвлэл
мэдээллийн хэрэгслээр олонд мэдээлэгдээд байхаар ноцтой асуудал биш. Өнгөрсөн
баасан гаригт Н.Нандин-Эрдэнийн ээж н.Номин-Эрдэнэ гэх эмэгтэй ирээд “Цэцэрлэгт
явуулаад долоо ч хоноогүй байхад хүүхдийн минь бугалга хөхөрч, чихнийх нь ар
хэсэг уруулж, нуруу нь хөхөрсөн байна” хэмээн гомдоллосон. Тухайн үед түүний
яриад байгаа шиг тэгтлээ аймаар хавдаад, хөхөрсөн зүйл байгаагүй. Есдүгээр
сарын 1-нд бугалга нь хөхөрсөн байсан гээд байгаа. Гэтэл тэр өдөр бараг хичээл
ороогүй шүү дээ. Ганц хоёрхон цаг болоод л эцэг эхчүүд хүүхдээ ирээд авцгаасан.
Эцэг эхээсээ анх удаагаа холдож байгаа нялх амьтад чинь дууд дуугаа аваад
үйлалдчихдаг юм шүү дээ. Харин нуруун дээр нь хурууны өндөгний дайтай хоёр
хөхөрсөн байсан. Гэхдээ хоорондоо хол зайтай. Хэрэв чимсэн бол хоорондохь зай
нь ойр, дээрээс нь андашгүй байна биз дээ. Нэг ой долоон сартайгаас хоёр нас
хүртлэх 30 гаруй хүүхдэд хоёрхон багш цаг минут тутамд анхаарал тавьж,
хараандаа байлгаж чадахгүй учраас хүүхдүүд нэгнээ санамсаргүй түлхэн унагаах,
ирмэгтэй зүйлээр цохих явдал байгнга биш ч гэсэн хааяа гардаг. Тэр бүү хэл
өөрөө гүйж яваад ч нуруугаа ширээ, сандлын буланд цохисон байхыг үгүйсгэхгүй. Бас
ангийнхаа н.Тэлмэн хэмээх охинд чихнийхээ ар хэсгийг маажуулчихсан байсан.
н.Тэлмэнгийн ээжид болсон явдлыг хэлээд, хүүхдийнхээ хумсыг авахыг сануулсан.
Гэтэл намайг маажсан гээд н.Номин-Эрдэнэ гүтгэсэн. Яаж ч бодсон тэр нялх
амьтдын хүзүү гарыг урж маажих нь бүү хэл чангахан ч атгаж зүрхэлдэггүй хүн
чинь юу боллоо гэж цус гарч, улайтал нь маажих билээ. Учраа мэдэхгүй нялх
хүүхдүүд нэгнийгээ маажих явдал байнга биш ч гэсэн хааяа тохиолддог. Тэглээ ч
чи энэ цэцэрлэгтээ сүүлийн 30 гаруй жил тасралтгүй багшилж байна. Өөрийнхөө ач
зээ шиг алгын чинээ нялх хүүхдийг хөх няц болтол нь зодно гэж юу байх билээ.
Хүсвэл та нарт хөх няц болтлоо зодуулсан гээд байгаа охиныг харуулж болно” гээд
танхим руугаа орсон юм. Цамцыг нь сөхөж нуруун дээр хөхрөлт болон чихний арын
сорвийг нь харууласан юм. Чихний арын өнгөж сорви бараг харагдааргүй болжээ.
Нуруунынх нь дунд болон доод хэсэгт хумсын толион чинээ хөх толбо үл мэдэг
харагдав. Тэрээр “Бодит байдал дээр байхад намайг хэвтэрт ортол нь зодож нүдсэн
мэтээр яриад байгааг би ойлгохгүй байна” гэв.
Түүнээс “Хандив
өгч ороогүй байж битгий олон юм яриад бай” гэж хэлсэн эсэхийг лавлахад “Би тэгж
хэлээгүй. Хүүхдээ 17 цаг 30 минутаас хэтрэлгүй, цаг нь ирээд авчихаж бай. Нас
өндөр болохоор эцэг эхчүүдийг нь хичээлийн дараа ирэхийг нь хүлээх хэцүүхэн л
байна шүү” гэж учирлаж хэлтэл өөдөөс “Мөнгө төлж ороогүй болохоор ингэж
гадуурхаад байгаа юм уу. Хичээлээ тараад шууд наашаа ирлээ. Бүх эцэг эхчүүд 17
цагаас өмнө хүүхдээ аваад, манай хүүхэд ганцаараа үлдчихээд байна уу” гээд
уурласан. Ингэж н.Номин-Эрдэнэ хэлчихээд сүүлд нь бид нарыг хэлсэн болгож,
ярьсан хэлснээ гуйвуулж байгаад харамсаж байна” гэв.
Н.Номин-Эрдэнэтэй
утсаар холбогдоход “Цэцэрлэгт явуулж эхэлсэн эхний өдрөөс л чихнийхээ ар хэсэгт
уруулж, гар нь хөхөрсөн байсан. Хичээлийн анхны өдөр багштай нь хэл ам хийгээд
хэрэггүй биз гэж бодтол 2 болон 3-нд нуруу, гуяны дотор хэсэг нь хөхөрчихсөн
ирсэн. Охиныхоо бие ийм болсныг хувцсыг нь солихдоо мэдсэн юм. Ингээд өнгөрсөн баасан гаригт О.Цэцгээд хэлэхэд
хүүхдүүдтэй хөөцөлдөж байгаад л тэгчихсэн биз. Юун сүртэй юм. Эсвэл өөр
цэцэрлэгт явуулж болно шүү дээ” гээд тоогоогүй. Яаж ч бодсон хүүхдүүд нэг
нэгнийгээ тэгж маажиж, цохихгүй. Тэгэхээр нь аргазүйч Ц.Батцэцэг дээр орж учраа
хэлтэл “Хүүхдээ аваад явахгүй юу даа” гэсэн. Миний охиныг цэцэрлэгэс нь хөөх
болсон шалтгаанаа бичээд өгчих. Тэр бичгийг чинь аваад би шалгуулах ёстой
газарт нь хүргэж өгье гэсэн чинь аргазүйч Ц.Батцэцэг надаас уучлал гуйсан.
Харин ангийнх нь багш О.Цэцгээ уучлал гуйгаагүй. Өмнө нь охиноо авах гээд
ялимгүй хоцроод очиход илүү цагийн хөлс мөнгийг нь өгөөрэй гэж загнаж байсан.
Илүү мөнгө нэхдэг шигээ хүүхдийг минь харахгүй л байгаа юм. Хэд хоногийн өмнө
охиноо авах гээд ангийнх нь шатаар өгстөл охин маань шатны ирмэг дээр зогсож
байсан. Багш нарын хэн нэг нь гарч ирээд авах нь уу гээд таван минут хэртэй
зогссон. Хэн нь ч гарч ирээгүй. Хоёрхон настай охин шатну уруу унасан бол хэн
хариуцлагыг нь хүлээх юм. Охиноо орой авахад шээсэн өмдтэйгөө л зогсож байдаг.
Дотуур өмд ч өмсгөөгүй байдаг. Энэмэтчилэн ярьвал их асуудал бий. Юутай ч
өнөөдрийг (өчигдөр) хүртэл охиноо хуучин ангид нь явуулж байгаа. Нийслэлийн
боловсролын газар зэрэг холбогдох байгууллагууд учир зүйг нь олсны дараа охиноо
энэ цэцэрлэгт явуулах эсэхээ шийднэ” гэв.