Дэлхийн улс орнуудад жил бүр хоолны томоохон фестивалиуд “Taste
of London”, “Taste of Paris”, “Taste of Chicago” нэртэйгээр зохион байгуулагдаж
хоолны урлагийн гайхамшиг, ач холбогдлыг олон нийтэд таниулсаар байдаг билээ.
Монголд ч “Найрсаг Улаанбаатар” хөтөлбөрийн хүрээнд гурав дахь
жилдээ “UB Food Festival 2015”-ыг “Viva city” хороололд өнгөрсөн амралтын өдрүүдэд
амжилттай зохион байгууллаа.
“Их Монгол”,”The Ivy”, “Irish pub”, “London pub”, “Hazara,
Namaste Indian Restaurant”, “Sky Lounge”, “Ungane”, “Irish castle”, “BBQ”,
“Biwon”, “Машико Сүши” гээд Монголын шилдэг 50 гаруй ресторан өөрийн нэрийн
хоолыг 1000-3000 төгрөгөөр худалдаалав. Энэ нь шилдэг ресторануудын хоолыг нэг
дороос хямд үнээр амтлах ховор боломж олгосон явдал юм. Тус фестивальд хүрэлцэн
ирж буй гэр бүлийнхэн, найз нөхөд амралтын өдрөө зугаатай өнгөрөөв. Мөн жуулчид
нэлээд ирж олон орны хоолноос амталж байсан юм. Хоолны олон асар гарсан байсан
ч энэтхэг болон ирланд хоолнуудыг хүмүүс сонирхож дараалал үүсгэж байлаа. Зарим асарт үйлчлүүлэгчдийн дунд тэмцээн
зохиож өөрсдийн нэрийн барааг гардуулж байв.
Хүмүүс хамгийн идэвхтэй оролцсон нь гэр бүлээрээ пицца идэх тэмцээн
байсан юм. “Kitchen all” төв тайз дээр болсон тус тэмцээнийг дэмжигчид ч ирж
сонирхож байлаа. Хоол идэхээс гадна “Open Mic” зохион байгуулагдаж, ковер дуулж
амттай хоол идэнгээ амьд хөгжим сонсох боломжийг олгосон юм.
Фестивальд оролцож байсан Баянзүрх дүүргийн иргэн Н.Батжаргал
“Олон орны жишгээр зохиогддог болсон энэ фестиваль үнэхээр сайхан болж байна.
Энэ үйл ажиллагааг иргэн хүний хувиасаа их дэмжиж байгаа. Анх зохиогдсон жилээс
нь л тасралтгүй ирсэн дээ. Энэ жилийнх нь хоол, амттаны хувьд илүү их
сонголттой болж. Хоолны фестиваль болно гэдгийг мэдээд л ирэх гэж бодсон. Үзэх
юм ихтэй сайхан болдог юм. Амралтын өдрөө зөв боловсон өнгөрүүлэх гээд гэр бүлээрээ
ирчихсэн байна. Найз нар маань араас ирж байгаа. Зохион байгуулалт ч сайтай
болж байна” гэв.
Эхний өдөр “UB Food
Festival 2015”-ын бас нэгэн тодотгол болох “Тогооч нарын халз тулаан” “Kitchen
all” төв тайз дээр болсон. Тус тэмцээнд зүүн булангаас Олон улсын хэмжээний
мастер тогооч Батмөнх, харин баруун булангаас Олон улсын хэмжээний мастер
тогооч Мөнгөө нар өрсөлдсөн юм. Тогооч нарын шилдгээр Олон улсын хэмжээний мастер тогооч Мөнгөө
шалгарсан.
Анх зохион байгуулагдсан фестивалиар Монголд рекорд тогтоож
хамгийн том бялууг хийж байсан билээ. Тус бялуу нь 3х1 метрийн хэмжээтэй ба 919
ширхэг өндөг, 30 кг гурил, 28 кг элсэн чихэр, 45 литр крем, 72 ширхэг лист
кекс, 1000 ширхэг сарнайн чимэглэлээр 17 тогооч найман цагийн турш хийж 1800 хүн
үнэгүй амталсан сайхан үйл явдал болсон юм. Үүний үргэлжлэл болгон уламжлал
ёсоор “Sweet Kitchen” фэйсбүүк группын авьяаслаг эзэгтэй нар ирсэн зочдоо таван
мянган ширхэг “cupcake”-ээр дайллаа.
Хоолны фестиваль нь өмнөх жилээсээ улам өргөн дэлгэр болж,
хоолноос гадна коктейль, шэйк нэмэгдсэн байлаа. Мөн хүүхдүүдийн идэх дуртай
амттан, зайрмагууд дэлгээтэй байсан юм. Фестивалийн үеэр зарим ресторанууд хөнгөлөлттэй
үйлчлүүлэх эрхийн бичиг гардуулж байв.
Зайрмаг авч зогссон И.Уянга “Манайх “Viva city”-д байдаг юм.
Хоолны баяр болоод сайхан байна. Хоолнуудын үнэ их таалагдаж байна. Нэг ч гэсэн
өдөр гэрийнхэнтэйгээ орж чаддаггүй рестораныхаа хоолыг аваад идэх боломжтой
болж байна шүү дээ. Өглөөнөөс хойш байрныхаа гадаа байлаа. Дуртай хоолноосоо
авч идээд л их сайхан байна” хэмээв.
Нийслэлийн иргэд энэ л өдрүүдэд ажлын алжаалаа тайлж, их хотын
дуу чимээнээс холдон шилдэг ресторануудын хоолыг амтархан идэж байв. Амтат
хоолуудыг идэхийн тулд урт дараалал үүссэн байсан ч иргэд энэ фестивальд ам
сайтай байсан юм. Харин “UB Food Festival 2015”-ын зохион байгуулагчид шилдгийн
шилдгүүдээ ирэх өдрүүдэд хэвлэлийн бага хурлаар зарлахаар боллоо.
Сонирхуулахад тус фестивалийн үеэр топ ресторануудын хоолыг
амтлангаа гэрэл зургийн уралдаанд оролцох боломжтой аж. Та уралдааны нэр болон
агуулгад нийцсэн зураг аваад өөрийн инстаграм хуудсандаа #ubfoodfestival
hashtag-аар томъёолж байршуулах юм
байна. Хамгийн их “like” авсан нэг ялагч тодрох бөгөөд “Monet” ресторанд 100
мянган төгрөгөнд хоол идэх эрхийн бичиг хожих аж.
С.Ариун
М.Мишээл
