Батлан хамгаалах яам 1939 оны Халхын байлдаанд оролцож, эх орон, тусгаар тогтнолынхоо төлөө халуун амь, бүлээн цусаа үл хайрлан тэмцсэн ахмад дайчин Г.Батмөнх, Ц.Чимэдцэрэн, Д.Шагдар, В.Аюурзана нарын дөрвөн бууралд хүндэтгэл үзүүллээ.
Батлан хамгаалахын дэд сайд Т.Дуламдорж ахмадуудад хандаж хэлсэн үгэндээ “Монгол орны тусгаар тогтнол, бүрэн эрхт байдлыг батлан хамгаалахын төлөө та бүхний халуун амь, бүлээн цусаа үл хайрлан тэмцэж авчирсан ялалтын баярыг Монгол орон даяараа тэмдэглэн өнгөрүүлж байна. Эрхэм буурлууддаа Батлан хамгаалахын сайдын нэрийн өмнөөс гүн хүндэтгэл илэрхийлье. Энэхүү түүхт ялалтын ойг тэмдэглэхдээ бид улсынхаа тусгаар тогтнол, нутаг дэвсгэрийн бүрэн бүтэн байдал, хүн ардынхаа амар амгалан байдлыг сахин хамгаалахын төлөө манай ахмад үеийнхэн яаж амь, бие хайргүй тэмцэж ирсэн, үүнд манай хөрш ЗХУ хэрхэн тусалсныг өнөө үеийнхэнд ойлгуулах, залуу, өсвөр үеийнхэн, цэрэг, дайчдыг өвөг дээдсийн уламжлал, эх оронч үзэл, сэтгэлээр хүмүүжүүлэх, дайнд оролцогчид, ялалтад хувь нэмрээ оруулагчдын гавьяа, зүтгэлийг мөнхөлж, дурсгалыг хүндэтгэхэд чиглэж байна. Бид тэгш ойтой жилдээ л яриад өнгөрөх биш үеийн үедээ ялалт ямар их үнээр олдсоныг сануулж байх ёстой. Энэ бол эрхэм буурлууд та бүхний өмнө болон дайнаас эргэж ирээгүй эрэлхэг дайчдын өмнө хүлээсэн ариун үүрэг юм” гээд эрүүл энх байж, урт удаан наслахыг хүсэн ерөөсөн юм.
Мөн тэрээр ахмад дайчин Г.Батмөнх, Ц.Чимэдцэрэн, Д.Шагдар, В.Аюурзана нарт “Та бүхний тэмцэж авчирсан ялалтын медаль” хэмээн Халхын голын байлдааны ялалтын 80 жилийн ойн медалийг энгэрт нь зүүж өгөөд мөнгөн тусламж, дурсгалын зүйл гардуулсан юм.
