УИХ энэ оны зургадугаар сард Багшийн хөгжлийн хуулийг баталсан юм. Ингэснээр багш нарын мэргэжил дээшлүүлэх, давтан бэлтгэх, ажлын байрандаа хөгжих, нийгмийн баталгааг хангах асуудал нь Боловсролын тухай хуулиар зохицуулагддаг байсан бол бие даасан хууль эрхзүйн зохицуулалттай болсон. Шинээр батлагдсан хуулиар Багшийн хөгжлийн төвийн үйл ажиллагаанд ЕБС, цэцэрлэг, мэргэжлийн боловсрол сургалтын байгууллагын нийт хувьсах зардлын хоёр хүртэл хувийг буюу 11.6 тэрбум орчим төгрөг зарцуулдаг болно.
Түүнчлэн багш нарыг ажилласан жилээр нь бус ажлын амжилт, эцэг эх, хамт олны санал, сэтгэл ханамжид тулгуурлан мэргэжлийн зэргийг нэмэгдүүлж, цалин хөлсийг нэмэгдүүлэх боломж бүрдсэн юм. Өөрөөр хэлбэл илүү ажиллаж байгаа нь тэр хэрээрээ цалин, урамшууллаа нэмүү авдаг үр дүнгийн болон ажлын гүйцэтгэлийн үнэлгээний систем бий болох ажээ. Мөн Багшийн хөгжлийн хуульд туссан нэг чухал заалт нь сургуульд 44-өөс дээш хүүхэдтэй ангид туслах багш ажиллах орон тоог бий болгох зохицуулалт юм. Түүнчлэн багш нар 5-10 жил ажиллаж байж зэрэг нэмэх зохицуулалттай байсныг өөрчилж, ажлын өндөр үр дүн гаргасан тохиолдолд нэмэх бололцоог бүрдүүлж байгаагаараа залуу багш нарт ач холбогдолтой болжээ. Багшийн хөгжлийн хууль ирэх 2019 оны нэгдүгээр сарын 01-нээс хэрэгжиж эхэлнэ.