Нийслэлийн хэмжээнд өнгөрсөн хоногт гал түймрийн гурван дуудлага бүртгэгдэж, алба хаагчид аюулгүй байдлыг хангаж ажиллалаа.
Гал түймэрт өртөж эрүүл мэнд, амь нас, өмч хөрөнгөөр хохирохоос сэргийлэн, гэр орон сууцныхаа яндан, пийшин зуухны аюулгүй ажиллагааг шалгаж, засаж сэлбэх, ашиглах боломжгүй болсон яндан зуухыг солих, түлшийг хэтрүүлэхгүй байх, угаарын хий мэдрэгчийн хэвийн ажиллагааг хангахыг онцгойлон сэрэмжлүүлж байна гэж НОБГ-аас мэдээллээ.
Нийслэлийн Онцгой байдлын газарт он гарсаар өнөөдрийн байдлаар объектын гал түймрийн 1674 дуудлага мэдээлэл ирж алба хаагчид шуурхай үүрэг гүйцэтгэж ажиллалаа. Эдгээрээс 251 удаагийн гал түймрийн шалтгаан нөхцөл нь гэр хорооллын айл өрхийн яндангийн цонолтоос үүссэн дуудлага эзэлж байна.
Цаг улирлын нөхцөл байдалтай холбогдуулан гэр хорооллын айл өрхийн пийшин зуух, яндангийн аюулгүй байдлаа хангаагүйн улмаас гал түймрийн эрсдэл нэмэгддэг.
Иймд, иргэд гэр орон сууцны галын аюулгүй байдлаа хангаж, бага насны хүүхдийг гал түймрийн аюул, ахуйн осол гэмтлээс хамгаалан, пийшин зуухны бүрэн бүтэн, аюулгүй байдлыг хангаж, цахилгааны утас, цахилгаан хэрэгслийн хэт ачаалал үүсгэхгүй байх, хүүхдээ хараа хяналтгүй гэрт нь цоожилж үлдээхгүй байхыг Нийслэлийн Онцгой байдлын газраас сэрэмжлүүлж байна.