Хөрөнгө оруулалтын тухай хуулийн шинэчилсэн найруулгын төслийг УИХ-аар хэлэлцэж эхэлсэн нь олны анхаарлыг татаж байна. Гадаадынханд газраа зуун жилээр өгөх гэж байна, 100 мянган ам.долларын босго тогтоох ёстой гэх зэргээр олон нийт шүүмжилж, Ерөнхийлөгч асан Х.Баттулга УИХ-ын даргад шаардах бичиг гардуулж, сөрөг хүчнээс ажлын гурав хоногийн завсарлага аваад буй. Гэвч эдгээрээс чухал олныг талцуулж байгаа зүйл нь хуулийн заалтад туссан “Эзэмших”, “Ашиглах” гэдэг үг болчихоод байна. Тэгвэл хууль санаачлагчдын зүгээс одоо хүчин төгөлдөр хэрэгжиж буй хуульд хөрөнгө оруулагчдад 100 жилийн хугацаатай газар эзэмшүүлэн, ашиглуулах дэмжлэг байснаас “эзэмших” эрхийг нь хассан гэж буй. Уг нь бол энэ хоёр үг бидний үгсийн санд бол хэдийнэ хуучирсан үг л дээ. Аль л 2013 оны үед Хөрөнгө оруулалтын хуулийг хэлэлцэж байхад ч яригдаж л байв.
Тэгвэл “Эзэмших” гэдэг нь тодорхой үр шимийг нь хүртэж болдог буюу тухайн газрыг хагалаад тариа будаа, ногоо тарьж ашиг олохыг хэлдэг байна. Харин “Ашиглах” гэхээр нэг ажилтан байгууллагынхаа ширээ сандалыг хэрэглэж байгааг ойлгож болно. Нэг ёсондоо тухайн байгууллагын өмч хөрөнгийг захиран зарцуулах, түүнээсээ ямар нэгэн ашиг хонжоо олох боломжгүй гэсэн үг.
Тэгэхээр газрыг ашиглана гэдэг ч үүнтэй нэгэн адил ойлголт юм байна. Үүнээс үзэхэд одоо УИХ-аар хэлэлцэж буй Хөрөнгө оруулалтын тухай хууль нь “Эзэмших” гэдэг үгийг хуулийн заалтаас хассан байна.