Монгол Улсын Ерөнхийлөгчийн ивээл дор, Монголд зочлох жилийн хүрээнд Азийн физикийн 23 дахь удаагийн олимпиадыг энэ сарын 22-28-нд Улаанбаатар хотноо зохион байгуулж, шилдгүүдэд шагналыг гардууллаа.
Тус олимпиадын нэгдсэн дүн мэдээ өчигдөр гарч, оролцогч орны ахлагч нар санал нэгтэйгээр баталсан юм. Энэ удаагийн олимпиадад 27 багийн 195 сурагч онолын болон туршилтын бодлогоор өрсөлдсөн юм. 23 дахь удаагийн олимпиадын үр дүнгээр
Хүрэл медалийн болзол хангасан 23 сурагч
Мөнгөн медалийн болзол хангасан 17 сурагч
Алтан медалийн болзол хангасан 33 сурагч тодорч зохион байгуулагчдаас шагналаа гардав.
Олимпиадын уламжлалын дагуу онолын болон туршилтын бодлогын ялагчийг тодруулдаг. Мөн энэ олимпиадын үнэмлэхгүй аваргыг нэрлэдэг байна.
Онолын бодлогын ялагчаар БНХАУ-ын сурагч Ланг Ченг Чао
Туршилтын бодлогын ялагчаар ОХУ-ын сурагч Игор Потапов
Үнэмлэхүй аваргаар БНХАУ-ын сурагч Ланг Ченг Чао шалгарсан юм.
Азийн Физикийн олимпиадаас Хятад, Оросын багийн бүх сурагч алтан медаль хүртсэн бол хамгийн өндөр буюу 33.5 оноог мөн Хятадын сурагч авсан байна. Зохион байгуулагч орон Монголын багаас 11 дүгээр сургуулийн сурагч Л.Дөлгөөн хүрэл медаль хүртлээ. Манай улсын тухайд 14 жилийн дараа дахин хүрэл медаль хүртэж байгаа юм.
Олимпиадын хаалтын ажиллагааны үеэр 24 дэх удаагийн олимпиадыг зохион байгуулах орноор Малайз улсыг нэрлэж шилжин явах тугийг хүлээлгэж өглөө.