“Дэлхийн боловсролын сайд нарын чуулга уулзалт”-ын үеэр Боловсрол, Шинжлэх Ухааны сайд Л.Энх-Амгалан Эдийн Засгийн Хамтын Ажиллагааны Нийгэмлэг(OECD)-ийн захирал Андреас Шлейчертай уулзжээ.
Ингэхдээ 2025 онд зохион байгуулагдах PISA үнэлгээнд Монгол Улс хамрагдах хүсэлтээ илэрхийлсэн байна.
PISA олон улсын үнэлгээ нь гурван жил тутамд зохион байгуулагддаг бөгөөд 2022 онд манай улсын 196 сургуулийн 15 настай 9,600 сурагч хамрагдаж байв. Сурлагын амжилтын олон улсын үнэлгээний тайлан энэ оны арванхоёрдугаар сард зарлагдана.
Уг үнэлгээгээр тухайн улсын боловсролын салбар ямар хэмжээнд байгааг олон улсын түвшинд харьцуулан тайлагнадаг. Өөрөөр хэлбэл бид боловсролын салбарын ололт болон алдаагаа энэ тайлангаас мэдэж авах, засах боломж бүрдэнэ гэж Боловсрол, Шинжлэх Ухааны Яамнаас мэдээллээ.