УИХ-ын нүүрсний асуудлаарх Түр хороо гэж бий. Даргаар нь УИХ-ын гишүүн Г.Ганболд ажилладаг. Энэ Түр хороог УИХ-аас 2022 оны зургадугаар сарын 10-нд 13 гишүүнтэйгээр байгуулсан. 13 гишүүнтэй. Гишүүдээр нь олонхыг төлөөлж Ц.Анандбазар, Б.Баттөмөр, Л.Мөнхбаатар, Г.Мөнхцэцэг, Н.Наранбаатар, Т.Энхтүвшин, С.Бямбацогт, цөөнхийг төлөөлөн С.Одонтуяа, Б.Бейсен, С.Ганбаатар, Н.Ганибал, Т.Доржханд нар байдаг.
УИХ-ын тогтоолоор Түр хороог “Нүүрсний экспорт саатаж, эндээс улсын төсөвт төвлөрүүлэхээр төлөвлөсөн орлого тасалдсан, Монгол Улсын хилээр нэвтрэх тээврийн хэрэгслийн зардал хэт өссөн, үүнтэй холбогдон өргөн хэрэглээний бараа бүтээгдэхүүний үнийн өсөлтийн шалтгаан, нөхцлийг тогтоох үүрэгтэй” гэж тодорхойлсон. Түр хорооны үйл ажиллагааг 2022 оны арванхоёрдугаар сарын 8-нд дахин зургаан сараар сунгасан байдаг. Харин тус Түр хороо энэ сарын 10-12-нд нүүрсний хулгайтай холбоотой асуудлаар нээлттэй сонсгол зохион байгуулахаар болоод байна. Өнгөрсөн сард дууссан Хөгжлийн банкны нээлттэй сонсголоос иргэд нэлээд тодорхой мэдээлэл авч чадсан. Тиймээс энэ сонсголоос тэр зэргийн нарийн, тодорхой мэдээлэлтэй болно гэсэн хүлээлт үүсээд байна.
Гэхдээ нүүрсний асуудлаарх Түр хороо энэ нээлттэй сонсголыг иргэдийн хүлээлт, нийгмийн шаардлагад нийцтэл зохион байгуулж чадах уу гэдэг асуудал яригдаж эхэллээ.
Учир нь 2023 оны гуравдугаар сарын 30-нд нээлттэй сонсголыг товлосон Түр хорооны хурал дээр Г.Ганболд “Хөгжлийн банкных бол бүх гэрээ, банкнаас авсан зээлүүдийн гэрээ нь олон мянган гэрээ байдаг. Үүнтэй холбогдуулаад олон хоног хийх зайлшгүй шаардлага гарсан юм байна лээ.
Манай сонсгол бол Хөгжлийн банкны сонсголоос хэлбэрийн хувьд ч, ер нь агуулгын хувьд арай өөр. Энэ агуулгаараа бид хянан шалгагч, шинжээч нартайгаа урьдчилж хуралдана. Манайд ирэх, асуугдах хүмүүс, гэрчээр дуудагдах хүмүүсийн тоо хэмжээ, тухайн асуудлаар хэлэлцэх асуудлууд нь олон хоногоор хийх шаардлагагүй. Ер нь гурав хоногт багтаагаад хийхэд нийгэмд энэ сонсголын хийх гэж байгаа бүх мэдээллүүдээ өгчихнө. Цаг хугацааны хувьд бүрэн боломжтой гэж урьдчилан дүгнэж, төлөвлөж байгаа” гэсэн. Гэвч үүнээс илүүтэйгээр гол эргэлзээ нь Түр хорооны дарга Г.Ганболдтой холбогдчихоод байна. Түүний тухайд, “Нүүрсний хэрэгт холбогдсон гишүүдийг хамгаалах, тэр дундаа Д.Бат-Эрдэнийг авч үлдэх талаар нэлээд идэвхтэй ажиллаж, намынхаа гишүүд дунд зохион байгуулсан гол хүмүүсийн нэг” гэх мэдээлэл улс төрийн хүрээнд тарж байна. Өөрөөр хэлбэл, “Ийм ажилд оролцож, зохион байгуулаад байгаа Г.Ганболд нүүрсний сонголыг хийж чадах уу.
Энэ хүн нүүрсчидийг илчилж чадах уу” гэж ярьж байна. Үнэхээр ч нүүрсний хэрэгтэй холбоотой олон оффтэйк гэрээ ил болсон. Бас “Эрдэнэс Таван толгой” компанийн худалдан авалттай холбоотой тендерүүд, дээрээс нь С зөвшөөрөл, нүүрс тээвэртэй холбоотой олон асуудал ойлгомж муутай хэвээр байгаа билээ.