Мөнгөний бодлогын хорооны шийдвэрийг Монголбанкны Ерөнхийлөгч Б.Лхагвасүрэн танилцууллаа.
Тэрбээр “Мөнгөний бодлогын хорооны ээлжит хурлаар эдийн засаг, банк санхүүгийн зах зээлийн өнөөгийн байдал, гадаад дотоод орчны төлөв, эрсдэлийг харгалзан үзээд олонхын саналаар бодлогын хүүг нэг нэгж хувиар нэмэгдүүлж, 13 хувьд хүргэх шийдвэр гарлаа. Энэхүү бодлогын шийдвэрийг гаргахдаа хэд хэдэн нөхцөл байдлыг болон цаашдын төлвийг харгалзаж үзсэн.
Гадаад орчны эрсдэл нэмэгдсээр байна. Түлш эрчим хүчний хомсдол олон оронд нүүрлэсэн. Түүнчлэн манай улсын худалдааны гол түнш болох урд хөршид “Тэг Ковид” бодлого хэрэгжиж байна. Дэлхий нийтээр үнийн өндөр өсөлттэй тэмцэж байгаа нь улс орнууд бодлогын хүүгээ өсгөхөөс өөрцгүйд хүргэж байна.
Дотоод эдийн засгийн идэвжил хүлээлтээс давсан. Энэ оны эхний гурван улиралын байдлаар эдийн засаг өмнөх оны мөн үеийнхээс 3.7 хувиар тэлж, сэргээд байна. Нүүрсний экспорт сэргэж, төмөр замын бүтээн байгуулалт хийгдсэн нь уур уурхай, тээвэр, барилгын салбарын өсөлтийг тэтгэлээ. Түүнчлэн өрхийн хэрэглээ сүүлийн дөрвөн улирал дараалан тогтвортой өссөн. Ийн эдийн засгийн идэвхжил нэмэгдэж, бодит ДНБ 10 улиралын дараа, цар тахлын өмнөх үе болох 2019 оны түвшнийг давлаа. Хөдөлмөрийн зах зээлд эерэг өөрчлөлт давамгайлж байгаа нь үүнд нөлөөлж байна” гэв.