Баруунд 3D-ээр хэвлэсэн галт зэвсэг хүчээ авч байна. Саяхан Их Британид 3D-гээр хэвлэсэн галт зэвсгийн эд ангиудыг хураан авчээ. Лондонгийн цагдаа нар нэгэн байшингаас их хэмжээний галт зэвсэг илрүүлж “Энд 3D галт зэвсгийн үйлдвэр ажиллаж байсан байж болзошгүй” гэж мэдэгдсэн байна. 3D галт зэвсгийн үйлдвэрлэл эрчимтэй хөгжиж байгаа нь шинэ аюул заналхийлэл бий болж дэлхий дахинаа хүрээ нь тэлж болзошгүй гэж анхааруулжээ.
2012 онд анх АНУ-д гар бууг 3D-гээр хэвлэж байсан. Анхны хувилбарууд нь мэдээж найдваргүй, ганц удаа л бууддаг зэрэг сул талтай байсан ч одоо бол “Хөнөөх чадвар өндөртэй, найдвартай” болсныг Их Британийн Үндэсний гэмт хэрэгтэй тэмцэх агентлаг зарласан байна.
Ингэхээр 3D гар буу нь тоглоомын төдий биш галт зэвсэг, зэр зэвсгийн ангилалд албан ёсоор орж ирсэн нь үүнээс харагдаж байна. Нөгөөтэйгүүр галт зэвсгийн шинэ эрин эхэлж байна гэж үзэх ажиглагчид байгаа юм. Галт зэвсгийн үйлдвэрлэл өндөр өртөгтэй, цөөн улс орнууд л үйлдвэрлэдэг. Гэтэл хүссэн хэн ч гэртээ буу болон эд ангиудыг нь үйлдвэрлээд эхэлж байгаа нь Их Британи төдийгүй дэлхий нийтийн анхаарлыг татаж байна. Ковидын хөл хорионы үед дэлхийн улс орнуудын хил хаалттай байсан нь галт зэвсгийн наймааг тасалдуулснаас гэмт хэрэгтнүүд 3D-гээр галт зэвсгийг өөрсдийн хэрэгцээнд шаардлагатай хэмжээгээр хэвлэж гаргасан нь энэ төрлийн буу зэвсгийн хөгжлийг түргэтгэсэн байж болзошгүй гэж таамаглажээ.
Брайтоны их сургуулийн криминологи, төрийн бодлогын профессор Питер Сквайрс энэ төрлийн зэвсэг аюул заналхийлэх магадлал өндөр гэж тодорхойлж “Хурд нь нэмэгдсэн байна. 3D-гээр галт зэвсэг хэвлэх технологи нь дэлхий даяар тархсан. Программ хангамж дизайн, хийцлэлийн бүхий л мэдээлэл нь интернэтээр түгсэн байна. Хуванцар буу гэж үл ойшоож болохгүй. Гэмт хэргийн 20 орчим хувь нь буугаар үйлддэг” гэжээ.
Галт зэвсэг эзэмших эрхгүй, галт зэвсэг олж авах боломжгүй хүмүүс бол хэвлэсэн галт зэвсгийн I зэргийн хэрэглэгчид болжээ. Ялангуяа хэт даврагчид 3D-гээр галт зэвсэг хэвлэж хэрэгцээндээ нийлүүлж байгаа аж. Испани, Швед, Герман, Голландад ийм зэвсэгтэй холбоотой гэмт хэрэг бүртгэгджээ. Харин террористууд энэ төрлийн зэвсгийг төдийлөн сонирхдоггүй гэнэ. Хэт даврагч үзэлтнүүд олон нийтийн хэлэлцүүлгийнхээ үеэр 3D хэвлэмэл зэвсгийг хэрхэн үйлдвэрлэх тухай зааварчилгааг гишүүддээ нээлттэй өгчээ.
3D-гээр бүтээсэн буугаар гал нээж буй нь
Хагас автомат зэвсгийг хэрхэн хэвлэх зааварчилгааг 2020 онд интернэтэд байршуулсан багөөд 100 гаруй хуудастай гарын авлага, үйлдвэрлэлийн үйл явцын үе шат бүрийг нэг бүрчлэн тайлбарласан бичлэгтэй байжээ. Шинжээчид “Үйлдвэрлэгчээс худалдаж авсан автомат буутай адил сайн” гэж тодорхойлж “3D
галт зэвсэг ойрын арван жилд боломжийн үнэтэй болж, өөрөө хийсэн зэвсгийг илүү бат бөх, найдвартай болгож чадна” гэжээ.
3D-гээр хэвлэсэн бууны 80-90 хувь нь технологийнхоо дагуу хийгдсэн байжээ. Эд ангиудын дундах металл хэсэг нь ихэвчлэн уламжлалт аргаар хийгдсэн байдаг юм байна. Гэсэн хэдий ч ирээдүйд металлын 3D хэвлэлт сайжрахын хэрээр энэ технологийг ашиглан илүү олон буу хийх боломжтой болох аж.
Галт зэвсгийн эд анги, бүрдэл хэсэг, зарим хэрэглэгдэхүүнийг хэрхэн хэвлэх тухай зааварчилгаатай бэлэн мэдээлэл интернэтэд элбэг байна. Тодорхой хэмжээний мөнгө төлж гарын авлага худалдаж авах аж. Хэдийгээр галт зэвсэг хувилах, хэвлэх хориотой ч бууны хэрэгслүүдээ үүгээр хэвлэж авах боломжтой хэмээгээд хэвлэж гаргасан эд ангиудын бодит зургуудаа танилцуулжээ.
3D-гээр хэвлэсэн буу
“3D галт зэвсэг хэвлэхийн тулд танд хэрэгтэй зүйлс: Creality Ender 3D принтерийг 190 ам.доллараар “Амазон”-оос захиал. Мөн эд ангиа хэвлэж гаргаж авдаг гол түүхий эд болох нэг дамар утсыг 22 ам.доллараар худалдаж аваарай” гэх зэргээр гарын авлагадаа дэлгэрэнгүй бичсэн байна. Creality Ender 3D принтер нь 220x220x250 мм хэмжээтэй аж.