Нар, дэлхий, сар гурав нэг шугамд зэрэгцэн сар дэлхийн сүүдэрт бүтнээрээ орох үзэгдлийг сарны бүтэн хиртэлт хэмээн нэрлэдэг билээ. Сар бүтэн хиртэх нь тийм ч ховор үзэгдэл биш бөгөөд маргааш /2022.11.08/ 2022 оны сарны хоёр дахь бүтэн хиртэлт болох гэнэ.
Энэ талаар Одон орон геофизикийн хүрээлэнгийн судлаач Б.Нямсүрэнгээс тодруулахад “Сар бүтэн хиртэлт болно. Гэхдээ Монголд төдийлөн сайн ажиглагдахгүй. Улаанбаатар хотод тэнгэр цэлмэг байвал оройн 19:00 цагийг орчимд зурвасхан ажиглагдана. Сарны хиртэлт жилд хоёроос дөрвөн удаа болдог. Монголд тод ажиглагддаг сарны хиртэлт ч олон байдаг” гэв.
Энэ удаа дэлхийн бөмбөрцөг сарыг нарны гэрлээс бүрэн халхлах тул хэсэг хугацаанд хүрэн улаан өнгөтэй харагдах аж. Сарны бүтэн хиртэлтийг Төв ба Зүүн, Зүүн Өмнөд Ази, Шинэ Зеланд, Умард Америк тивээс харах боломжтой юм байна. Сарны бүтэн хиртэх хугацаа нь нэг цаг 24 минут ажээ.