БНСУ-ын Сөүл хотын Юнсан дүүргийн Итэвон хороонд Халловины (Halloween) баяр тэмдэглэх үеэр хэт их хүний бөөгнөрөл үүсч, амьсгалах боломжгүй болтлоо нэгнийгээ шахаж, дарсан тул 155 хүн харамсалтайгаар амиа алдсан. Энэ талаар тухайн үед баярт оролцож явсан монгол иргэнээс дараах торуулгыг авсан юм.
-Тухайн үед юу болсон юм бэ?
-Хэт олон хүний бөөгнөрлөөс болоод л тухайн осол болсон. Тэнд зүгээр л баярлахаар ирсэн хүмүүс байсан. Сүнс гэхээсээ илүү цасангоо, хүн аалз, үлэг гүрвэл, авакадо, банана, Харри Поттер, PUBJ гээд гоё ганган багт наадмын хувцастай залуус их байсан даа.
-Та бас осолд өртөж даруулсан гэсэн, яаж гарсан юм бэ?
-Азтай байсандаа л баярлаж байна. Хүмүүс зогсоогоороо байгаа хэрнээ бүгд ухаангүй болчихсон. Миний хөл дээр хоёр, гурван хүн дараад уначихсан намайг татаж сугалаж гаргасан. Тэгээд сандарсандаа нэг зай руу шургаад ортол оочер дайрлаа гэсэн. Гайхаад асуутал хүмүүс клубт орох гээд оочерлож байсан юм билээ. Хажууд хүмүүс юу болсныг ч мэдээгүй баярласаар л байсан.
-Тухайн агшинд юу бодогдож байв?
– Хүн ер нь гудамжаар алхаж яваад ч үхэж болох юм байна, дараа гэж хойшлуулалгүй байгаа цаг хугацаандаа жаргалтай амьдраарай. Хүнд бурууг бүү санаарай, эцсийн мөчид чинь бурхан амьсгалах агаар бэлэглэдэг юм байна гэж л бодсон. Үүнээс илүү мэдээлэл өгөх боломжгүй байна. Ослын талаар ямар нэгэн мэдээлэл өгөхгүй байхыг анхааруулсан хэмээв.
Тухайн ослын талаар Солонгост ажиллаж амьдардаг хүмүүс ямар мэдээлэлтэй байгаа талаар Сөүл хотод сурдаг иргэн н.Энхжингээс тодруулахад “Харамсмаар үйл явдал болоод Солонгосын ард түмэн цочролд орцгоосон. Энд шинэ хууль дүрэм гараад тухайн хэргийн талаар хувь хүн дур мэдэн мэдээлэл өгөх, элдэв зураг хийх зэргийг хорьсон. Одоо мэдээлэл өгөх хүн ховор байх даа. Ямартаа ч энд хэрэг болохоос өмнө сануулга маягаар хэд хэдэн хүн хүмүүсийн хөдөлгөөн их байгааг сануулж цагдаагийн 112 утсанд мэдэгдсэн юм билээ л дээ. Цагдаагийн газраас өчигдөр (уржигдар) мэдээлэл хийж ард түмнээс уучлалт хүсэж байсан” гэв.
Тус хэргийн талаар Солонгос улсын Инчеон хотод ажиллаж амьдарч буй иргэн Мандахтай холбогдон дараах мэдээллийг авав.
-Итэвоны ослын талаар танд мэдээлэл бий юү?
-Улсаас нь тэр хэргийн талаарх зураг, дүрс бичлэгийг онлайнд гаргахгүй байх талаар арга хэмжээ авч байгаа.
-Гашуудлын хоногуудыг хэрхэн даван туулж байна вэ?
-Аравнэгдүгээр сарын 5-ны өдрийг хүртэл гашуудал зарласан байгаа. Мэдээж тийм олон хүн нэг дор амь насаа алдахаар маш харамсалтай. Солонгосын ард түмэн их гашуудаж байна.
-Улсаас нь ослын дараа ямар арга хэмжээ авч байгаа бол?
-Улсаас нь эмгэнэл илэрхийлж, ослын нөхөн олговор ар гэрт нь олгоно гэсэн. Мөн бэртэж гэмтсэн хүмүүст олон талт арга хэмжээ авч байж болох бүх хэлбэрээр тусламж үзүүлж байгаа тухай мэдээллүүд их явж байна.
-Осол гарах үеэр хүн хүч дутмаг байгаа талаар мэдээлэл яваад байсан. Одоо ямар байгаа бол?
-Дутмаг гэхээсээ илүү маш олон хүний бөөгнөрөл үүсч, дарагдсан байсан учраас тэр гудамж руу орох асуудал нь хүнд байсан. Тухайн үед яаралтай онц байдал зарлаж, ойрхон хотуудаас эмнэлгийн нэмэлт хүч ирсэн. Та өөрөө төсөөлөөд үз л дээ. Наашаа ч үгүй, цаашаа ч үгүй гацчихсан байсан, тийм их хүн шүү дээ. Эмнэлгийн машин байтугай хүн ч орох боломжгүй байдалтай байсан.
-Гэмтэж бэртсэн хүмүүс ямар байгаа талаар мэдээлэл явж байгаа болов уу?
-Яг ямар байгааг нь сайн мэдэхгүй ч ямартаа ч эмчилгээ хийгдэж байгаа гэсэн.
-Ослын газраас их хэмжээний эд зүйлс олдож ар гэрийнхэнд нь таниулж байгаа гэсэн. Бодит тоон мэдээлэл нь явж байна уу?
-Бодит тоон мэдээллийн зураг нь яваад байсан. Танд явуулъя. Та биччихнэ биз дээ.
-Ослоос болж нас барсан хүний тоо одоо хэд болсон бэ?
-Нийт 155 хүн болсон байна лээ. Гадаадын хэд хэдэн улсын иргэд бас амь нас хохирсон юм билээ гэв.
Түүний өгсөн мэдээллээр ослын газраас нийт 1.5 тн хувцас, хувийн эд зүйлс бүхий 124 цүнх, 258 хувцас, 256 хос гутал, 66 ширхэг өрөөсөн гутал, 156 электрон хэрэгсэл олдсоныг ар гэрийнхэнд нь таниулж, хүлээлгэн өгөхөөр дэлгэн тавьжээ. Тус ослын улмаас 155 хүний амь нас хохирсон. Үүнд хэд хэдэн гадаадын иргэд буй. Нас барсан гадаад иргэдэд Солонгосын иргэдтэй ижил ар гэрт нь сэтгэл санааны хохиролд зориулан 20 сая вон болон оршуулгын зардалд 15 сая вон хүртэлх мөнгөн тусламж үзүүлэхээр болжээ. Мөн Солонгост очих ар гэрийнхнийг нь байрлах буудлын 70 мянган вон олгох бөгөөд онгоцны билетийг нь олгох талаар агаарын тээврийн компаниудтай хэлэлцэж байгаа ажээ.