Монгол Улсын дээд шүүхийн Ерөнхий шүүгч Д.Ганзориг Япон улсын Нагояагийн их сургуулийн Азийн Сателит Кампус Институтийн захирал Ямаучи Акира тэргүүтэй тус сургуулийн профессоруудыг 2022 оны 10 дугаар сарын 4-ний өдөр хүлээн авч уулзлаа.
Ерөнхий шүүгч Д.Ганзориг 2019 оны Үндсэн хуулийн нэмэлт, өөрчлөлт болон 2021 оны 3 дугаар сарын 1-нээс хэрэгжиж эхэлсэн Шүүхийн тухай хуулиар шүүхийн бие даасан, шүүгчийн хараат бус байдал, сахилга хариуцлагатай холбоотой асуудалд зарчмын шинжтэй өөрчлөлт орсныг онцлов. Мөн хуулиар Улсын дээд шүүхийн хэрэг хянан шийдвэрлэх ажиллагааны хүрээ хязгаарыг гурван үндэслэлд багтаан зохицуулсны гол агуулга нь хууль хэрэглээний нэгдмэл байдлыг хангах асуудал болохыг тэмдэглэлээ. Хууль хэрэглээний нэгдмэл байдлыг хангах ажилд судалгааны туслалцаа үзүүлэх, Монгол Улсын нийт 117 шүүхэд сургалт, судалгааны үйл ажиллагааг бүх түвшинд зохион байгуулах зорилгоор Дээд шүүхийн дэргэд байгуулагдсан Шүүхийн сургалт, судалгаа, мэдээллийн хүрээлэнтэй хамтран ажиллах, шүүгчдийг сургалтад хамруулах зэргээр харилцаагаа өргөжүүлэх хүсэлтэй байгаагаа Ерөнхий шүүгч илэрхийлэв.
Нагояагийн их сургуулийн профессорууд Монгол Улсын дээд шүүхийн Ерөнхий шүүгч тэднийг хүлээн авч уулзаж буйд баярлаж байгаагаа илэрхийлээд тус сургууль 1990-ээд оноос Азийн орнуудтай хууль эрх зүйн салбарыг сайжруулах тал дээр хамтран ажиллаж ирсэн, Монгол Улсын дээд шүүхтэй сургалт, судалгаа болон бусад чиглэлээр харилцаагаа өргөжүүлэхэд бэлэн байна гэлээ.
Уулзалтад Япон Улсын Нагояагийн их сургуульд хууль зүйн ухааны докторын зэрэг хамгаалсан Монгол Улсын дээд шүүхийн шүүгч Ц.Цогт, Н.Баярмаа нар, мөн тус сургуульд магистрын зэрэг хамгаалсан Шүүхийн сургалт, судалгаа,мэдээллийн хүрээлэнгийн захирал Д.Эрдэнэчимэг болон Дээд шүүхийн Тамгын газрын дарга С.Заяадэлгэр, Нагояагийн их сургуулийн професор Ёокомизо Дай, Мураками Масако, Мацуо Ёо, Мацуда Такафуми нар оролцов гэж Монгол Улсын Дээд шүүхээс мэдээллээ.