Орон нутгийн нислэгийн суудал дүүрэхгүй, ашиггүй байгаагаас зарим аймаг руу хийх нислэгийг есдүгээр сар хүртэл хаасан. Хязгаарлалт тогтоосон зарим аймаг руу үйлдэх нислэгийг сэргээх, зорчигч ихтэй нислэгийн хуваарийг нэмэх талаар авиа компаниуд судалж эхэлжээ.
Тухайлбал, “Аэро Монголиа” компанийн хувьд суудал дүүргэлтээс шалтгаалж Увс зэрэг зарим аймгийн нислэгүүдээ цуцлаад байсныг сэргээхдээ нэг талын нислэгийн үнийг 200 мянган төгрөг болгож буулгасныг ИНЕГ мэдээлэв.
“Хүннү эйр” компанийн хувьд 9 дүгээр сарын 9, 18-нд Увс руу нислэг үйлдэх аж. Одоогоор эхний нислэгийн суудал дүүрчээ. Нэг талын тийзний үнэ 572 мянган төгрөг аж.
Түүнчлэн, Баян-Өлгий, Ховд, Завхан руу 7 хоногт тус бүр 2 удаа хуваарьт нислэг үйлдэж байна. Суудал захиалгын тоо ирэх очих хоёр талдаа нийлээд 70-аас дээш болсон тохиолдолд нэмэлт нислэг үйлдэх боломжтой. Үнийн дүнд өөрчлөлт оруулахгүй аж.