Бэлчээрийн ургамлын ургалт долоодугаар сарын 10-ны байдлаар нийт нутгийн 50 орчим хувьд буюу Хөвсгөл, Сэлэнгэ, Булган, Орхон, Дархан-Уул, Говьсүмбэр, Дорнодын нийт, Архангай, Төв, Хэнтий, Сүхбаатарын ихэнх, Говь-Алтай, Баянхонгор, Өвөрхангай, Дундговь, Дорноговийн зарим, Баян-Өлгий, Ховдын ганц нэг сумдын нутгаар сайн байна. 40 орчим хувьд дунд, 10 орчим хувьд буюу Өмнөговийн зарим, Баян-Өлгий, Ховд, Увс, Говь-Алтай, Баянхонгор, Өвөрхангай, Дундговь, Дорноговийн ганц нэг сумдын нутгаар муу байна. Салхины хурд ихэнх нутгаар түр зуур 16-27 м/с буюу аюултай үзэгдлийн хэмжээнд хүрч салхилсан байна.
Газар тариалан бүхий ихэнх нутгаар улаан буудайд голлолтын үе шатнаас түрүүлэлтийн үе шат явагдаж байгаа бол төмсөнд ихэнх нутагт хажуугийн нахиа үүсэх үе шатнаас цэцэглэлтийн үе шатанд байна. Улаан буудайн өндөр нь сорт болон тариалсан хугацаа, үе шатнаасаа хамааран харилцан адилгүй, 26-88 см байна.