Даваа гарагт АНУ-ын баруун дундад орших Иллинойс мужид Тусгаар тогтнолын баярын жагсаалын үеэр буутай этгээд гал нээсэн хэрэг гарсан. Халдлагад долоон хүн өртөж, 30 гаруй хүн шархадсан. Хэрэгт сэжиглэгдсэн этгээдийг цагдаа нар баривчилж, цагдан хорьжээ.
Тодруулбал, орон нутгийн эрх баригчдын мэдээлснээр 30 гаруй хүн, тэр дундаа хүүхдүүд шархадсан байна. Чикаго хотоос хойд зүгт 40 км-ийн зайд орших Хайлэнд Паркт хэрэг гарчээ. Цагдаагийнхан уг этгээдийг барилгын дээвэр дээрээс гал нээсэн байж болзошгүй гэж сэжиглэж байна. АНУ-ын Ерөнхийлөгч Жозеф Байден Цагаан ордонд болсон тусгаар тогтнолын баярын үеэр уг хэрэгтэй холбогдуулан үг хэлжээ. Тэрбээр “Бидний ардчилалд, бидний амьдралд баталгаатай зүйл байхгүй гэдгийг өдөр бүр бидэнд сануулдаг.
Бид үүнтэй тэмцэх хэрэгтэй” гэв. Хэрэгт сэжиглэгдэж байгаа этгээд “Эй-Ар 15”-тай төстэй өндөр хүчин чадалтай винтов буу ашиглан худалдааны төвийн байрны дээрээс 70 гаруй удаа буудсан гэж Лэйк дүүргийн гэмт хэрэгтэй тэмцэх албаны төлөөлөгч хэвлэлийн бага хурал дээр мэдэгджээ.
Сэжигтэн өмнө нь 2019 онд амиа хорлох, мөн хүчирхийлэл үйлдэнэ хэмээн заналхийлсэн шалтгаантай хоёр удаа дуудлага ирж, тухайн үед цагдаа нар түүний гэрээс 16 хутга, чинжаал, сэлэм хураан авч байсан аж.