Уолт Дисней компани анхны аяллын хөлөг онгоцоо өчигдөр /2022.06.29/ албан ёсоор танилцууллаа. Энэ нь 10 жил өнжсөний эцэст танилцуулж буй анхны хөлөг юм. 144 мянган тонн жинтэй, 4000 зорчигчийн багтаамжтай “The Wish” хөлгийг зах зээлд гаргахын тулд зургаан жил зарцуулжээ.
Үйл ажиллагааны орлого нь 2022 оны санхүүгийн жилийн эхний хагаст 4.2 тэрбум ам.долларт хүрч, өмнөх оны 535 сая ам.долларын алдагдлыг нөхнө гэж тооцоолж байна. Дисней компанийн санхүүгийн жил долдугаар сарын 1-нээс эхлээд дараа оныхоо зургадугаар сарын 30-нд дуусдаг. Усан онгоцны аялал нийт орлогод хэр их хувь нэмэр оруулдаг талаар тодорхой мэдээлээгүй ч гүйцэтгэх захирал Чапекийн мэдэгдсэнээр хөрөнгө оруулалтыг хоёр оронтой тоогоор өсгөсөн гэв.
“The Wish” хөлөг нь Диснейн флотын тав дахь хөлөг онгоц бөгөөд түүхэн дэх хамгийн том өргөтгөл нь ажээ. Тус компани 2025 он гэхэд дахин хоёр хөлөг онгоц нийлүүлнэ. Диснейн хөлөг онгоцнууд цар тахлын үеэр 15 сарын турш аялалд гараагүй байсан.
“Disney cruise line” холбооноос тооцоолсноор, 2023 оны эцэс гэхэд нийт зорчигчдын тоо 29.7 сая хүрнэ гэв. Аялал жуулчлал эргээд сэргэж эхэлсэн тул захиалга нь тогтмол нэмэгдэж байгаа аж. “The Wish” хөлгийн анхны аялал долдугаар сарын 14-нд Флоридагийн Канаверал боомтоос хөдөлнө.
Диснейн хөлгөөр аялснаар “Aqua Mouse” нэртэй далайн хамгийн анхны үзэсгэлэнг үзэх боломжтой. Мөн “Solo: A Star Wars Story” киноны дүрүүдийг харуулсан Оддын дайны сэдэвтэй сансрын амралтын өрөөг бүтээжээ. Усан онгоц бүхэлдээ биет болон дижитал ертөнцийг хослуулсан загвартай.
