Олон улсын хүүхдийн эрхийг хамгаалах өдөрт зориулсан арга хэмжээний талаар Нийслэлийн соёл урлагийн газар, Нийслэлийн гэр бүл хүүхэд залуучуудын хөгжлийн газар, Тээврийн цагдаагийн албанаас мэдээлэл өглөө. Энэ жилийн Хүүхдийн баярыг “Мөнх тунх, Энх тунх Монгол хүүхэд 2022” нэрийн дор тэмдэглэн өнгөрүүлэх юм байна. Соёлын бүтээлч үйлдвэрлэлийг дэмжих чиглэлээр үндэсний брэндийг таниулах, үндэсний өв соёлоо таниулах хүрээнд “Мөнх тунх” брэндийг хүүхэд багачуудад таниулах юм байна.
Удирдах албан тушаалтнууд хүүхдүүдэд зориулан хүндэтгэл илэрхийлж, парад алхах бөгөөд Монголын соёл урлагийн хамтлаг дуучдын тоглолт төв талбайд болох юм. Мөн энэ өдөр тээврийн хэрэгслийн хөдөлгөөнийг хэсэгчлэн хязгаарлана. Тухайлбал, Өглөөний гудамж, Засгийн газрын ордны зүүн, баруун тал, Спортын төв ордон, “Туушин” зочид буудлын урд замыг хаах юм байна. Мөн Дэлхийн сүүний өдөр тохиож буй учир 10 мянган хүүхдэд сүү тараахаар төлөвлөснөө хэллээ.