БНХАУ-ын эдийн засаг энэ оны эхний улиралд 4.8 хувиар өсч, зах зээлийн хүлээлтээс давсан байна.
Тус улсын Үндэсний Статистикийн газрын цахим хуудсанд нийтэлсэн тоо баримтад дурдсанаар, урьдчилсан тооцоогоор эхний улиралд ДНБ өмнөх оны мөн үеэс 4.8 хувиар, өмнөх оны дөрөвдүгээр улирлаас 1.3 хувиар тус тус өсчээ. Өмнө нь шинжээчдийн дунд явуулсан санал асуулгаар Хятадын эдийн засаг өмнөх оны мөн үеэс 4.4 хувиар, өмнөх улирлаас 0.6 хувиар өснө гэж таамаг гарч байсан билээ. Харин “Bloomberg”-ийн судалгаанд хамрагдсан эдийн засагчид тус улсын эдийн засгийг өмнөх оны мөн үеэс 4.3 хувиар, өмнөх улирлаас 0.7 хувиар өснө гэсэн таамаг гаргаж байсан юм.
Өнгөрсөн онд БНХАУ-ын эдийн засаг 8.1 хувиар өссөн нь зах зээлийн хүлээлт болон эрх баригчдаас дэвшүүлсэн албан ёсны зорилтоос давсан. Тус улсын ажилгүйдлийн түвшин өнгөрсөн сард 5.8 хувьтай гарсан нь өмнөх сараас 0.3 нэгжээр өссөн үзүүлэлт болоод байсан билээ.
Ийнхүү Хятадын эдийн засаг таамгаас даван өсч байгаа нь ажилгүйдэл багасаж иргэдийн амьдрал дээшилнэ гэсэн үг юм.
Г.АМАРСАНАА