Украины Буча хотод 300 орчим хүнийг бөөнөөр нь нэг булшинд оршуулсан тухай бид өмнө нь мэдээлсэн. Тэгвэл уг үйл явдалтай холбоотой аливаа хаштагийг фэйсбүүк дээр хэрэглэхийг түр хугацаанд хориглосон байна.
Фэйсбүүк болон инстаграм дээрх хүчирхийллийн дүрслэлийг сканердах үйлдэлтэй автомат системүүд нь “bucha”, “buchamassacre” зэрэг хаштагуудыг хориглоно гэж Метагийн хэвлэлийн төлөөлөгч Энди Стоун хэллээ.
Фэйсбүүк, инстаграм платформууд нь хүний эрхийг зөрчсөн байж болзошгүй үйлдлийг олон нийтэд таниулах зорилгоор зарим дүрс бичлэг, хүчирхийллийн контентыг нийтлэхийг зөвшөөрдөг. Гэвч хэтэрхий ил тод, нүд хальтрам контентыг устгадаг байна. Түүнчлэн зарим контентыг үзэхийн өмнө анхааруулах тэмдэг гарч ирдэг.
Хүний эрхийн байгууллагууд Орос, Украины мөргөлдөөнтэй холбоотой хүчирхийллийн агуулга бүхий зураг, бичлэгийг устгаж буй Метагийн арга барилыг шүүмжилсэн. Тодруулбал, Мета компани 90 хоногийн дараа серверээсээ өгөгдлийг устгадаг нь дайны гэмт хэргийн чухал нотлох баримтуудыг устгаж байна гэж үзжээ.
Киевээс холгүйхэн орших Буча хотод болсон аймшигт аллага нь барууны орнуудын Москвагийн эсрэг авах хориг арга хэмжээг улам лавшруулах төлөвтэй байна.