НҮБ-ын бүх гишүүн улсууд хэрэгжүүлэх үүрэгтэй “Байгаль хамгаалах гэж тогтвортой ашиглахыг хэлнэ. Тогтвортой ашиглах гэж байгаль хамгаалахыг хэлнэ” гэсэн зарчмыг бодитоор хэрэгжүүлэн жилд 100 000 бор гөрөөс агнадаг Люксембург хот улсын Сангийн сайд Юрико Бакес хоригт орсон оросуудын дансны 2.5 тэрбум еврог царцааж байгаагаа албан ёсоор зарлав. Украинд ихэнх цэргээ явуулаад байсан Уулын Карабахын ОХУ-ын хариуцаж буй бүсэд Азарбайжаны арми туркийн дроноор цохилт өгч Армены мэдэлд байсан стратегийн ач холбогдол бүхий Караглух уулын өндөрлөгийг хүчээр эзлэн авав.
Азербайжаны “Байрактар” дроны цохилтод Армены гурван цэрэг амиа алдаж 14 цэргийн албан хаагч шархдав. Мөн Европын Холбооны гишүүн дөрвөн улс Оросын дипломатчид тагнуулын ажиллагаа явуулсан гэж нутаг дэвсгэрээсээ хөөв.Ирланд, Бельги, Нидерланд, Чех улсын эрх баригчид тус тусын нутагт суугаа ОХУ-ын Элчин сайдын яамны нийт 43 ажилтныг хөөх шийдвэр гаргасан байна. Бельгийн Гадаад хэргийн сайд Софи Уилмес өөрийн парламентад үг хэлэхдээ Брюссель дэх Элчин сайдын яамны, Антверп дэх консулын газрын нийт 21 орос ажилтныг нутаг дэвсгэрээсээ хөөх шийдвэр гаргасан болохыг мэдээлжээ. Уг арга хэмжээгээ тэр “үндэсний аюулгүй байдалтай холбоотой” гэж тайлбарласан байна. Нидерландын гадаад хэргийн яам бас тагнуулын нууц ажиллагаа явуулсан хэмээн Оросын 17 дипломатчийг өөрийн улсаас хөөжээ. Мөн Тагнуулын байгууллагынхаа зөвлөмжийн дагуу Оросын элчингийн дөрвөн ажилтныг хөөх болсноо Ирландын ерөнхий сайд Майкл Мартин мөн л парламентдаа мэдэгдсэн байна. Оросын дипломатчид олон улсын дипломат ёсны стандартад нийцэхгүй үйл ажиллагаа явуулж байгаа тул ийм шийдвэр гаргасан гэж тэрээр тайлбарлав.
Бас Чех улсын засгийн газар ОХУ-ын Элчин сайдын яамны дэд тэргүүнийг хөөсөн гэж мэдээлсэн юм. Өнгөрсөн долоо хоногт Польш улс Оросын Элчин сайдын яамны 45 ажилтныг тагнуулын ажиллагаа явуулсанд буруутган хөөх шийдвэр гаргаж байв. Тэгвэл энэ сарын эхээр Болгар, Литва, Латви, Эстони улсууд дипломат үйл ажиллагаанд нийцэхгүй үйлдэл гаргасан Оросын элчин сайдын яамны нийт 20 ажилтныг нутаг дэвсгэрээсээ хөөж байжээ. Үүний хариуд ОХУ-ын засгийн газар тус улс дахь Эстони, Латви, Литвийн элчин сайдын яамдаас нийт 10 дипломатчийг хөөсөн байна. Орос ийнхүү олон улсад эрчимтэй ганцаардаж байгаа учир ОХУ-ын Төрийн Дум орос хэлтэй гадаадын иргэдийг “эх орон нэгтэн”-д тооцох хуулийн төслийг хэлэлцэх асуудлын жагсаалтад яаралтай горимоор оруулжээ. “Эх орон нэгтэн” буюу “соотечественник” гэсэн ойлголтод хуучин Зөвлөлтийн бүрэлдэхүүнд байсан болон одоогийн ОХУ-ын бүрэлдэхүүнд байгаа улсуудын орос хэлтэй иргэдийг оруулж, тэдэнд улс төрийн болон бусад төрлийн дэмжлэг туслалцаа үзүүлэх, ОХУ-ын иргэн болох эрхийг нь хууль ёсны болгох юм байна. Уг хуулийн төсөлд мөн “төр, улсаа байгуулж буй ард түмэн” гэх “государствообразующий народ” гэсэн ойлголтыг тусгажээ. Үүнд өөрийн улсаас салан тусгаарлах гэсэн орос хэлтнүүд буюу Украин, Беларусь Казахстан гэх мэт улсуудын орос үндэстнүүдийг багтааж байгаа аж. Энэ ойлголтыг өмнө нь ОХУ-ын үндсэн хуулийн шинэчилсэн найруулгад тусгах санал гарч байсан ч Оросын Холбооны бүрэлдэхүүнд багтдаг бусад үндэстэн угсаатнуудын төлөөлөл эсэргүүцсэн тул буцааж байсан юм. Харин олон улсын шинжээчид уг хуулийг ОХУ-аас тусгаар улсуудын бүрэн бүтэн байдалд заналхийлж, дотоод хэрэгт нь хөндлөнгөөс оролцох гэсэн бүдүүлэг үйлдэл хэмээн дүгнэж байна.
Г.АМАРСАНАА