БНСУ-д ерөнхийлөгчийн сонгуулийн санал хураалт өнөө өглөө эхэллээ. Энэ удаагийн сонгуульд эрх баригч намаас нэр дэвшигч, өрхийн амьжиргааг дээшлүүлэх амлалт өгсөн Ли Жэ Мён болон сөрөг хүчний гол намаас нэр дэвшигч, шударга нийгмийг цогцлоохоо амлаж буй Юн Сок Ёлын хооронд хүчтэй өрсөлдөөн өрнөж байгаа юм.
Сонгогчдын саналаа өгөх сонирхол өмнөх сонгуулиудынхаас өндөр байгааг өнгөрсөн долоо хоногт болсон урьдчилсан санал хураалтын сонгогчдын ирц харуулж байна. Тодруулбал, санал өгөх эрхтэй 44 сая сонгогчийн 36.93 хувь буюу 16 сая гаруй иргэн баасан, бямба гарагт болсон урьдчилсан санал хураалтын үеэр саналаа өгсөн байна.
Энэ нь 2014 онд урьдчилсан санал хураалтын системийг нэвтрүүлснээс хойших хамгийн өндөр үзүүлэлт болжээ.
Энэхүү сонгууль нь мөн БНСУ-д “COVID-19” халдварын тохиолдлын тоо сүүлийн долоо хоногуудад эрс нэмэгдэх болоод байгаа үед болж байгаа юм.
“COVID-19”-өөр халдварласан олон зуун мянган өвчтөний санал өгөх эрхийг харгалзан Засгийн газар тусгаарлалтын дэглэмээс гарч санал өгөхийг нь зөвшөөрсөн боловч бэлтгэл хангаагүйгээс эрт санал хураалт явуулахад өвчтөнүүдийн саналыг зориулалтын саналын хайрцаг бус гялгар уут зэрэгт цуглуулсан алдаа гарсан байна.
Лхагва гаргийн санал хураалтад халдвар авсан өвчтөнүүд болон тусгаарлагдаж байгаа хүмүүс оройн 18:00-19:30 цагийн хооронд буюу санал хураалт дууссаны дараа оролцох боломжтой байна. Сонгуулийн үндэсний хороо мөн тэднийг саналын хайрцагт саналаа шууд хийхийг зөвшөөрөх зохицуулалтыг хянан нягталжээ.
Эрх баригч Ардчилсан намаас нэр дэвшигч Ли Жэ Мён, сөрөг хүчний Иргэний хүч намын нэр дэвшигч Юн Сок Ёл нарын дунд хүчтэй өрсөлдөөн өрнөж байгааг өнгөрсөн долоо хоногт орон даяар зогсоохоос өмнө явуулсан санал асуулгын дүнгүүд харуулж байжээ.
Томоохон телевизүүд сонгогчдыг саналаа өгсний даруу явуулсан санал асуулгын дүнг 19:30 цагт танилцуулахаар товлоод байгаа ч халдвар авсан өвчтөнүүд, тусгаарлагдаж байгаа хүмүүсийн санал хураалттай холбоотойгоор хойшилж магадгүй байна.
Сонгуулийн санал хураалт хаагдсан даруйд орон даяар санал тоолох ажил эхлэх бөгөөд саналын хуудасны тооллого хэвийн явагдвал ялагч хэдэн цагийн дараа тодрох боломжтой ч эцсийн дүн пүрэв гаргийн өглөө хүртэл гарахгүй байх төлөвтэй байгаа ажээ.