Хар тэнгисийн нэгэн арлыг хамгаалж байсан Украины хилийн цэргүүд Оросын тэнгисийн хөлгийн шаардлагыг хүлээж аваагүй тул бүгд амь үрэгджээ.

16 гектар талбайтай Могойт арал (Змеиный остров) нь Крымийн хойгоос баруун зүгт 300 км зайтай оршдог. Уг арлыг Украины хилийн 13 цэрэг хамгаалж байжээ.

Пүрэв гарагт Оросын тэнгисийн хөлөг уг аралд ойртож ирээд хилийн цэргүүдэд зэвсгээ хаян бууж өгөхийг радио холбоогоор шаарджээ.

Гэвч цэргүүд Оросын хөлөгт “там руугаа тонил” гэсэн утгатай хариу өгсөн байна. Дараа нь Оросын тал аралд хүчтэй цохилт өгснөөр Украины бүх цэрэг алагджээ.

Ерөнхийлөгч Володимир Зеленский өчигдөр хилийн цэргүүд бууж өгөхөөс татгалзаж, бүгд амь үрэгдсэнийг дуулгаад тэднийг улсын баатар цолоор нэхэн шагнах болсноо мэдэгдсэн байна.

Украины хэвлэлүүд Оросын хөлөг онгоц болон хилийн цэргүүдийн хооронд харилцсан ярианы бичлэгийг өчигдөр өөр өөрийн сувгуудаар тараажээ.

Могойт арал нь Украин, Румын улсуудын дунд оршдог ба өмнө нь эдгээр улсуудын хооронд газар нутгийн маргаан үүсгэж байсан гэдэг.

Тус арал газрын тосны нөөцтэй стратегийн чухал байрлалд тооцогддог юм байна.