БНХАУ-ын Үндэсний хөгжил шинэтгэлийн хороо тус бүр тэрбум ам.долларын өртөг бүхий нүүрсний гурван уурхай байгуулах зөвшөөрөл олголоо.
Өнгөрсөн онд БНХАУ-д нүүрсний нөөц нь багасаж, эрчим хүчний хомсдол үүсэж, нүүрсний үнэ огцом өссөн юм. Үүний дараа дотооддоо нүүрсний олборлолтоо нэмэгдүүлэх ажлыг эрчимжүүлээд байгаа юм.
Уурхайнуудын хоёр нь Шаньси мужид, нэг нь ӨМӨЗО-д байрлалтай бөгөөд төслийн нийт санхүүжилт 3.8 тэрбум ам.доллар байх юм байна. Жилд дунджаар 19 сая тонн нүүрс олборлох тооцоо гарчээ.
2021 оны эцэст БНХАУ-д нүүрс олборлолт шинэ дээд түвшинд хүрсэн юм. Цаашид ч нэмэгдэх хандлагатай байна.
БНХАУ уур амьсгалын өөрчлөлтийн эсрэг тууштай тэмцэж, сэргээгдэх эрчим хүчийг хөгжүүлэхээс гадна нүүрсний хэрэглээг бууруулахгүй гэдгээ мэдэгджээ. Тус улсын хувьд эрчим хүчний хомсдол үүсэхээс сэргийлэх нь илүү чухал байгаа аж.
БНХАУ-ын эрчим хүчний эх үүсвэрийн 60 хувь нь нүүрс байдаг. Өнгөрсөн оны аравдугаар сард нүүрсний үнэ дээд түвшинд хүрснээс хойш буурсан үзүүлэлттэй байна.
ОХУ болон Украины геополитикийн асуудал хурцадсан энэ үед Европт нүүрс, эрчим хүчний үнэ өсөх төлөвтэй байна. Харин Азид нүүрсний хэрэглээгээр тэргүүлдэг БНХАУ, БНЭУ дотооддоо үйлдвэрлэлээ нэмэгдүүлж, бусад улсаас авах эрэлт буурснаар үнэ буурах магадлалтай байгаа юм.