Мароккод худгийн нүхэнд унасан таван настай хүүг дөрөв хоногийн дараа гаргасан ч хүү эндсэн тухай ВВС мэдээллээ. Райан хүү өнгөрөгч мягмар гарагт худгйн нүхэнд унаж, 32 метрийн гүнд гацжээ. Аврагчид болон сайн дурынхан хүүг аврахын тулд дөрөв хоногийн турш зэрэгцээ хонгил ухаж, бямба гарагийн орой гарган авсан байна.
Аврах ажиллагааг хэвлэлийнхэн шууд дамжуулан хүргэж, улс даяараа сэтгэл зовнин хүлээж байв. Хүүг гарган авах мөчид биеийн байдлынх нь талаар ямар нэг мэдээлэл гаргаагүй бөгөөд цугласан олон баяр хөөр болцгоожээ. Гэвч хүү эндсэн талаар Мароккогийн хаан VI Мохаммед хэдэн минутын дараа албан ёсоор мэдэгдсэн байна. Тэрээр хүүгийн эцэг эхэд гүн эмгэнэл илэрхийлжээ. Нийгмийн сүлжээнд ч хүмүүс эмгэнэл илэрхийлсэн байна.
Хүү нэг бол газар доор удаан байснаас эсвэл толгойдоо гэмтэл авснаас болж амиа алдсан гэж үзэж буй.
Райан хүү мягмар гарагт алга болжээ. Хүүгээ хэдэн цаг хайсны эцэст худаг руу унасныг нь мэдсэн гэж аав нь орон нутгийн хэвлэлийнхэнд ярьсан байна. Аврах ажиллагааг тухайн өдөр эхлүүлсэн бөгөөд хүүд хүрэхийн тулд худагтай зэрэгцээ хонгил ухаж, дараа нь гурван метрийн холбогч өрөмдөж хийжээ. Чулуулаг хөрстэй байсан учраас аврах ажиллагаанд хүндрэл учруулж байв