Ням гаригт Африк тивээс Нидерландын нийслэл Амстердам хотын нисэх буудалд газардсан ачааны нисэх онгоцны урд дугуйн хэсгээс амьд хүн гарчээ.
“Хүнд нөхцөл байдалд хулгайгаар зорчиж ирсэн эрэгтэйг эмнэлэгт хэвтүүлсэн. Бид нэн тэргүүнд энэ хүний эрүүл мэндэд санаа зовж байна. Ийм өндөрт нисээд хүйтнийг тэсэж гарна гэдэг бол маш ховор тохиолдол” гэж Нидерландын хил хамгаалалтын албаны төлөөлөгч Жоанна Хелмондс ярьсан байна.
Тэрбээр хулгайгаар зорчигчийн нас, үндэсний харьяалал зэрэг мэдээллийг өгөхөөс татгалзжээ.
Cargolux компанийн ачаа тээврийн Boeing 747 нисэх онгоц Өмнөд Африкийн Йоханнесбург хотоос Нидерландын нийслэлд ирэх замдаа Кенийн нийслэл Найробид түр зогссон юм байна.
Ядуу буурай орны иргэд нисэх онгоцны эвхэгддэг урд дугуйн хайрцагт нуугдаж өрнөдийн орнууд руу дүрвэх оролдлого үе үе гардаг ч ихэнх тохиолдолд хулгайн зорчигч нь хөлдөж амиа алддаг.
Эх сурвалж: Reuters