Улс оронд нь коронавирусийн өвчлөл, эндэгдэл нэмэгдэж байгаатай холбогдуулан цар тахалтай тэмцэх үйлсэд зэвсэгт хүчнээ дайчилж магадгүй болсныг ОХУ-ын ерөнхийлөгч Владимир Путин өчигдөр мэдэгджээ.
Тэрбээр даваа гаригт ОХУ-ын батлан хамгаалахын сайд Сергей Шойгу болон армийн бусад өндөр албан тушаалтнуудтай уулзахдаа “Улс орны нөхцөл байдал маш хүнд байна. Өдөрт 40,000 гаруй тохиолдол. Өмнө нь хэзээ ч ийм өндөр байгаагүй. Шаардлагатай бол иргэний эрүүл мэндийн байгууллагуудад тусламж, дэмжлэг үзүүлэхийг би та нараас хүсэж байна. Магадгүй бэлэн материалаар түр эмнэлгүүд угсрах шаардлага гарвал армийн нөөц чадварыг ашиглах хэрэгтэй болох байх” гэж хэлсэн байна.
Өнгөрсөн долоо хоногийн сүүлээс эхлэн ОХУ даяар иргэдийг гэрт нь суулгаж, хөл хорионы хатуу дэглэм хэрэгжүүлж эхлээд байгаа.
Москвагаас баруун хойд зүгт оршдог Новгород мужийн захиргаа хөл хорионы хугацааг сунгах болсноо өчигдөр зарласан анхны бүс нутаг болжээ.
ОХУ даяар цар тахал эхэлсэн цагаас хойш 8.5 сая гаруй хүн өвчилж, өнгөрсөн сарын 21 өдөр нь нэг өдөрт хамгийн олон хүн “Covid-19” өвчний улмаас нас барсан үзүүлэлт шинэчлэгдэж байв.