Киотогийн Энхтайваны олон улсын чуулга уулзалт 10 дугаар сарын 29-31-нд Киотогийн их сургуульд зохион байгуулагдан өнгөрөв. Дэлхийн өнцөг булан бүрийн 63 орны эрдэмтэн, судлаач, оюутан залуучууд цахимаар дамжуулан энх тайвныг илэрхийлэгч хүчин зүйл болох ядуурал, хэт хөдөлмөр эрхлэлт, гадуурхал, амиа хорлолтыг багасгах, боловсролын эрх тэгш байдал, байгаль орчны тэнцвэр, аз жаргалын индекс зэрэг долоон асуудлаар 500 хувь хүн, 17 байгууллага оролцож, “Бид нэгэн дэлхийтэй” уриан дор илтгэлээ тавин, хэлэлцүүлэг боллоо. Оролцогчийн 46 хувь нь эмэгтэйчүүд буй нь хүйсийн тэгш эрхийг дэмжиж буйтай холбоотой байв. Японы сурагчид хуванцар хог хаягдал хэт ихсэж буйг онцолж байсан бол Монголоос МУИС-ийн ОУХ-ны 1-р дамжааны оюутан Ц.Номин-Эрдэнэ, М.Анунгоо нар удирдсан багш МУИС-ийн бизнесийн сургуулийн дэд профессор Г.Уянгын хамт цахимаар оролцож, монгол улс дахь хүний эрх болон ялгаварлан гадуурхах асуудлаар илтгэлээ тавилаа. Ядуурлын нэгэн шалтгаан нь халамжийг хэт хавтгайруулсантай холбоотой гэдгийг онцолж мөн тэрбум модны уриалгыг дурдав. Аз жаргалтай орны жагсаалтад 149 орноос Монгол улс 70-р байрт жагссан байв. Японы “Ротари” клуб гол зохион байгуулагч бөгөөд Монгол Японы “MOJANA” хамтын ажиллагааны ашгын бус байгууллагын тэргүүн Г.Заяасайхан монголын оюутнуудаа оролцоход дэмжиж, хамтран ажилласан юм.
Х.ЭРДЭНЭЦЭЦЭГ