Баянзүрх дүүргээс сонгогдсон УИХ-ын гишүүд, Нийслэл, дүүргийн төлөөлөгчид, төрийн албан хаагчид хамтран дүүргийн 11, 20, 23 дугаар хорооны дөрвөн байршил 143.2 га талбайд 200 мянга гаруй мод, бут тарих ажлыг зохион байгуулжээ.
Модыг зөвхөн тариад орхих биш сар бүр тордож, усалж, ундаалж байх нь чухал. Тиймээс “УИХ-ын гишүүдийн төгөл”, “НИТХ-ын төгөл”, “Баянзүрх дүүргийн ИТХ-ын төгөл”, “Баянзүрх дүүргийн Засаг даргын тамгын газрын төгөл” гэх нэршлүүдийг өгч, тарьсан модоо эргээд усалж, ундаалдаг байх хариуцсан эзэдтэй болгосон Баянзүрх дүүргийн ИООНХХ-ээс мэдээллээ.
Энэ үеэр Баянзүрх дүүргийн Засаг дарга Н.Баярмөнх “Дүүргийн даргын хувьд ганц л зарчим барьж ажиллаж байгаа. Энэ нь иргэдээ эрүүл, аюулгүй тав тухтай орчинд амьдарч, ажиллуулах. Тиймээс дүүргийн алслагдсан хороодод сул шороо ихтэй газруудад мод тарьж төгөл бий болгох. Харин дүүргийн төв орчимд зөвшөөрөлгүй гарааш, хашаа, хайсыг буулгаж иргэддээ ээлтэй ногоон байгууламжийг бий болгохоор зорьж ажиллаж байна. Бусад дүүрэг, аймаг, сумдын удирдлага, иргэдийг ч мөн адил өөрсдийн амьдарч, ажиллаж буй орчиндоо ногоон байгууламж, төгөл барихыг уриалж байна” гэсэн юм.