“Эрдэнэс Монгол” ХХК-ийн Гэрээ эрх зүй, хамтын ажиллагааны газрын санаачилгаар “Эрдэнэс Монгол” ХХК, “Эрдэнэс Газ” төслийн нэгжийн хамт олон коронавирус цар тахлын тархалт нэмэгдсэн энэ цагт улаан бүсэд ажиллаж буй Эх хүүхдийн эрүүл мэндийн үндэсний төв /ЭХЭМҮТ/-ийн Эх барих, эмэгтэйчүүдийн эмнэлгийн тусгаарлах тасагт нэг өдрийн цалингаа хандивлалаа.
ЭХЭМҮТ-д нийслэл болон орон нутгаас хэвтэн эмчлүүлж буй жирэмсэн эх, хүүхдийн тоо коронавирусийн тархалттай холбоотойгоор нэмэгджээ. Иймд Эрчимт эмчилгээний тасагт амьсгалын аппарат болон зөөврийн рентген хүрэлцээ хангамж дутагдаж байгааг тус эмнэлгийн Төрөх тасгийн эрхлэгч Ж.Энхтуяа хэллээ. Уг эмнэлэгт ганцхан зөөврийн рентген байдаг бөгөөд хэвтэн эмчлүүлж байгаа хүмүүсийн тооноос хамаарч, сүүлийн өдрүүдэд хүрэлцэхгүй, олон хүмүүс дундаа хэрэглэж байгааг учирлаж байв.
Эмч, сувилагч болон бусад ажилчид бүхий л нөөц боломжоо ашиглан өдөр, шөнөгүй жирэмсэн эх хүүхдийн төлөө хичээнгүйлэн ажиллаж байна. Эмнэлгийн хамт олны зүгээс аюулт цар тахлын энэ хүндхэн цаг үед нийгмийн хариуцлагаа ухамсарлан олон эх хүүхдийг эрүүл энх болоход дэмжин нэг өдрийн цалингаа хандивласан “Эрдэнэс Монгол” ХХК-ийн хамт олонд талархаж буйгаа энэ үеэр илэрхийлсэн юм.