Эстонийн нийслэл Таллин хотноо болж буй даамын насанд хүрэгчдийн ДАШТ-ий эрэгтэйчүүдийн хагас шигшээ тоглолтууд дуусахад “Tallinn group”-т өрсөлдсөн Дэлхийн даамын холбооны мастер Цогтбаатарын Сүхбат 2 хожиж, 7 тэнцсэн амжилтаар хэсэгтээ IV байр эзэллээ.
Энэ шатанд 40 даамчин дөрвөн хэсэгт хуваагдан өрсөлдсөн байна. Ц.Сүхбатын хувьд “Брунссум Опен” тэмцээний аварга ОУМ Кристиан Ниами /Камерун/, Зул сарын цахим тэмцээний ялагч Макенди /Гаити/ нарыг хожиж, дэлхийн аварга Александр Шварцман /ОХУ/, Их мастер Юрий Аникеев /Украин/, Ндиага Самб /Сенегал/, Мартин ван Айзендорн /Голланд/ нарын шилдгүүдтэй тэнцсэн юм.
Тэмцээний дотоод журам ёсоор хэсэг тус бүрийн эхний гурав, нийт 12 шалгарсан даамчин финалын шатанд дэлхийн аварга цолын төлөө өрсөлдөх юм. Ц.Сүхбатын хувьд олон улсын чансаагаа ахиулж, Олон улсын мастер, Олон улсын их мастер цолны балл биелүүлэх нь тодорхой болов.