Беларусийн Ерөнхийлөгч Александр Лукашенко Украинтай залгаа хилээ хаахыг хилийн цэргүүдэд үүрэг болгожээ.
Энэ тухай тэрбээр баасан гарагт Беларусийн Тусгаар тогтнолын өдөрт зориулсан хүндэтгэлийн хуралдааны үеэр мэдэгдсэн байна.
“Украинаас Беларусь руу асар их хэмжээний зэвсэг орж ирж байна. Тиймээс би хилийн цэргүүддээ Украинтай хилээ бүрэн хаахыг даалгасан” гэж Лукашенка хэлжээ.
Тэрбээр мөн тус улсад Герман, Украин, АНУ, Польш, Литва улсуудтай холбоотой, өөрийгөө хамгаалах анги гэгддэг “унтаа” “террористуудын сүлжээг” илрүүлсэн гэж мэдэгдсэн байна.
“Эдгээр “үүрүүдийн” гол зорилго нь “икс” өдөр засгийн эрхийг хүчээр солих юм. Тэд өөрсдөө “икс” өдөр нь ямар өдөр болохыг хараахан мэдэхгүй байна” гэж Лукашенко мэдэгджээ.
Өмнө нь тэрбээр Беларусьт “терроризмтой тэмцэх” томоохон ажиллагаа явуулсан гэж мэдэгдэж байжээ.