Утгын чимэг-2020” богино өгүүллэгийн наадам амжилттай болж өндөрлөлөө.
Энэ жилийн Утгын чимэг наадам Төрийн шагналт, Соёлын гавьяат зүтгэлтэн, Д.Нацагдоржийн нэрэмжит шагналт их зохиолч Цэндийн Доржготовын нэрэмжит болсон юм.
Наадмыг МЗЭ, МҮОНРТ, Архангай аймгийн утга зохиолын ХАНТАМИР ТӨВ, Архангай аймгийн ЗДТГ хамтран зохион байгууллаа. Уг наадамд нийт 60 гаруй зохиолчид бүтээлээ ирүүлснээс шилдэг 10 бүтээл шалгарч, сүүлийн шатанд тунаж үлдсэн юм.
МЗЭ-ийн шагналт зохиолч Соёрхын Пүрэвсүрэнгийн “Хөнөгийн цагаан салхи” өгүүллэг магнайлж, МЗЭ-ийн шагналт зохиолч Сааюугийн Баттулгын “Хонхор газар” өгүүллэг удаалж, МЗЭ-ийн шагналт зохиолч, яруу найрагч, судлаач Пүрэвхүүгийн Батхуягийн “Төлөө” өгүүллэг гутгаар байранд орж, МЗЭ-ийн шагналт зохиолч Түмэнбаярын Бум-Эрдэнийн “Амьдын хорвоо” өгүүллэг дөтгөөр байр, МЗЭ-ийн шагналт зохиолч Цэвэгжавын Ганболдын “Уулын мухарт” өгүүллэг тавдугаар байр эзэллээ.
Мөн Ардын жүжигчин, өгүүлэхүйн урлагийн их мастер Гомбын Равдан “Утгын чимэг” наадмын шилдэг уран уншигч- өгүүлэгчийг шалгаруулж СТА, орчуулгын киноны дуун хөрвүүлэгч Өлзийн Наранбаатарыг шагнаж урамшууллаа.
Цар тахалтай хүнд үед уран бүтээлээ туурвиж оролцсон нийт зохиолчид, дуун өгүүлэгч, жүжигчин, нэвтрүүлэгч, хөтлөгч нартаа маш их баярлалаа. Та бүхэндээ уран бүтээлийн өндөр амжилт хүсэн ерөөе.
ХАНТАМИР ТӨВ
2020.07.02.