Улсын онцгой комисс хуралдаж эхний ээлжид Үндэсний их баяр наадмыг наймдугаар сарын 1-нийг хүртэл хойшлуулах нь зүйтэй гэж үзжээ.
Улсын онцгой комиссын уг саналыг Засгийн газар хэлэлцэж эцэслэн шийдвэрлэх юм.
Үндэсний их баяр наадмыг үзэгчгүй, цахимаар зохион байгуулах шийдвэрийг Засгийн газар гаргаж наадмын бэлтгэл ажлыг эхлүүлсэн билээ. Нээлтийн урлаг соёлын арга хэмжээний зураг авалт, хүчит бөхчүүдийн бэлтгэл Хүй долоон худагт эхэлсэн.
Гэвч өнөөдөр /2021.07.01/ УИХ дахь эмэгтэй гишүүдийн төлөөлөл мэдээлэл хийж наадмыг хойшлуулах санал гаргасан юм. Энэ талаар УИХ-ын гишүүн Д.Сарангэрэл “Коронвирусийн халдварын тархалт ихээр нэмэгдэж байгаа бөгөөд ойрын үед сайжрах төлөв ажиглагдахгүй байна. Тиймээс УИХ-ын эмэгтэй гишүүд тодорхой санал, санаачилга гаргаж, Засгийн газар, УОК-д хандаж байна. Юуны өмнө улсын баяр наадмыг хойшлуулах саналыг гаргасан. Бидний саналыг Ерөнхий сайд хүлээн авсан” гэлээ.
Засгийн газрын ээлжит бус хуралдааныг маргааш 09:00 цагт товлосон бөгөөд наадмын асуудлыг хэлэлцэхээр байгаа юм.