Ардчилсан намын дарга М.Тулгат:
-2020 оны УИХ, орон нутгийн сонгуульд хөндлөнгөөс нөлөөлсөн байж болзошгүй асуудал дэлгэгдэж байна. Программ хангамжид захиалгаар нөлөөлж, УИХ-ын нэр дэвшигчдээс тодорхой хүмүүсийг ялуулсан гэх хэргийг зургаан сар шалгаад хохирогчгүй гээд хаасан байна. Хэрэв ард түмний сонголтыг МАН луйврын аргаар авсан бол энэ жил Ерөнхийлөгчийн сонгууль явуулах боломжгүй. Мэргэжлийн байгууллага олон нийтийн оролцоотойгоор онц зөвлөл байгуулж, энэ асуудлыг тодорхой түвшинд шийдтэл Ерөнхийлөгчийн сонгуулийг хойшлуулах шаардлагыг тавьж байгаа юм. Бид Сонгуулийн ерөнхий хороонд Ерөнхийлөгчийн сонгуулийг хойшлуул гэсэн шаардлагыг тавьж байна.
Нийслэлийн Ардчилсан намын дарга Э.Бат-Үүл:
-Ардчилсан намын дарга М.Тулгатын хэлсэн шаардлагыг онцгой анхаарах асуудал. Сонгуулийн үйл явцад хөндлөнгөөс нөлөөлж, луйвраар хийж байна гэсэн яриа гарч байсан. Энэ бүгдийг өнгөрсөнд нь орхиж явсаар байгаад төрийн эрх мэдлийг хууль бусаар, луйвраар авч буй жишиг тогтлоо. Тийм юм бол ардчилалаар яах юм бэ гэдэг асуудал тавигдаж байна. Ийм нөхцөл байдлыг засах ёстой. Одоо энэ байдалтай эвлэрэхгүй. Ардчиллыг хүсдэг, дэмждэг ард түмнээ хуурсан их ноцтой үйлдлийг гаргасан.
Ардчилсан намын ерөнхий нарийн бичгийн дарга Ч.Өнөрбаяр:
-Олон нийтийн зөвлөлөөс олон нийтийн оролцоотой хийж буй дүгнэлтийг СЕХ нэн даруй нээлттэй зарлахыг бид шаардаж байна. Өнгөрөгч 2020 оны сонгуулийг хууль бусаар авсан талаар АН-аас мэдээлж байсан. Энэ хэрэг дээр Ардчилсан намаас өргөдөл гомдол гаргасан. Гэтэл энэ хэрэгт шалгагдаагүй эргэлзээтэй олон зүйл байна.