МУЭ-ийн дэргэдэх Залуу уран бүтээлчдийн нэгдлийн уламжлалт “Алтан бийр-15” үзэсгэлэн цахимаар зохион байгуулагдаж, шилдгүүдээ тодрууллаа.
“Алтан бийр-15” үзэсгэлэнгийн шилдэг бүтээлийн шагналыг Соёлын яамны Урлаг, уран бүтээлийн газрын дарга Б.Сэргэлэн, Монголын Урчуудын Эвлэлийн ерөнхийлөгч Б.Төмөрбаатар, “Залуу уран бүтээлчдийн нэгдэл”-ийн тэргүүн С.Зэсээ, Залуу уран бүтээлчдийн нэгдлийн тэргүүлэгч гишүүн Н.Отгонбат нар өнөөдөр гардуулав.
“Алтан бийр-15” үзэсгэлэнгийн тэргүүн байрт LAND бүтээлээр уран бүтээлч Л.Очирсүх шалгарч, “Алтан бийр” цом, мөнгөн шагнал, МУЭ-ийн уран бүтээлчдийн урланд уран бүтээлээ хийх нэг жилийн эрхээр, үзэгчдийн таашаалд нийцсэн бүтээлээр уран бүтээлч С.Балжинням нар тодорлоо.
“LAND”
Керамик
Дэлхий даяар модыг тасдаж хүн төрөлхтний хөгжилд ашиглаж байгаад уг бүтээлээрээ сануулж байна. Мод ургахдаа маш удаан хугацааг зарцуулан хүн болон амьтанд амьдрал бэлэглэх хүчийг өөртөө агуулж байдаг. Энэхүү бүтээлийн материал нь бидний газар шорооны нэгэн хэсэг шавраар бүтээгдэж модны хэв шинжийг агуулан гол цуурсан хэсэгт алтан паалан ашигласан нь модны хэрчим бүр үнэ цэнтэй гэдгийг илэрхийлнэ.
НАЙМАН НУУР
Зотон тос
“Намрын хүйтэн уулан дундаа
Найман нуур уйдах цагаар
Наран хайлах хонгор говийн
Нарийн тоос хэнзлэн байдаг
Хөвч ногоон уулын хангай
Хөшиг номин талын хангай
Уудам цэнхэр говийн хангай
Унаган нутаг минь Өвөрхангай”