ОХУ-ын Татарстаны Бүгд Найрамдах Улсын нийслэл Казань хотын нэгэн дунд сургуульд өнөөдөр (2021.05.11) зэвсэгт халдлага гарч, 11 хүний амь хохирчээ.
“Ria Novosti” агентлагийн мэдээлснээр, 175 дугаар дунд сургуульд гарсан зэвсэгт халдлагын үеэр найман сурагч амиа алдсан байна.
Халдлага үйлдэгч хоёр этгээдийн нэг 17 настай эрэгтэйг баривчилсан бол нөгөө нь хүн барьцаалсан байж болзошгүйг зарим эх сурвалж мэдээлжээ.
Татарстаны Ерөнхийлөгч, Эрүүл мэндийн сайд, Ерөнхий прокурор нар хэргийн газарт ирээд байгаа аж. Мөн 20 орчим түргэн тусламжийн машин ирж, цагдаагийн алба хаагчид үлдсэн сурагчдыг сургуулиас аюулгүй гаргасан байна. Казань хотын бүх боловсролын байгууллагын харуул хамгаалалтыг чангатгажээ. Мөн халдлага болсон сургууль дээр сэтгэл зүйчид ирж, айж цочирдсон сурагчдыг тайвшруулж байгаа аж.
