УИХ-д суудалтай нам, эвслүүд Монгол Улсын Ерөнхийлөгчид нэр дэвшигчдээ тодруулах хугацаа өнөөдрөөр дуусгавар болно.
АРДЧИЛСАН НАМААС ЕРӨНХИЙЛӨГЧИЙН СОНГУУЛЬД НЭР ДЭВШИГЧИД
Ардчилсан намаас тус бүрдээ хамгийн олон санал авсан нэр дэвшигчдээ тодруулсан. М.Тулгат даргатай АН-аас С.Эрдэнэ, О.Цогтгэрэл даргатайгаас нь Н.Алтанхуяг нар дэвшихээр болсныг тус тус мэдээлээд байна.
С.Эрдэнийн хувьд Р.Амаржаргал, Ц.Оюунгэрэл, Д.Ганбат, Л.Гүндалай нартай өрсөлдөн, нэгээр гарсан.
Тодруулбал:
- УИХ-ын гишүүн асан С.Эрдэнэ-1953,5
- УИХ-ын гишүүн асан Р.Амаржаргал-1826,3
- УИХ-ын гишүүн асан Ц.Оюунгэрэл-1719,43
- АН-ын гишүүнчлэлээ сэргээсэн Л.Гүндалай-1463.92
- УИХ дахь АН-ын бүлгийн дарга Д.Ганбат- 637.29 оноо тус тус аван С.Эрдэнэ ялалт байгуулсан юм.
Харин өнөөдрийн Ардчилсан намын Үндэсний бодлогын хорооны 286 гишүүн цахимаар хуралдаж, санал хураалтаар 97.6 хувь нь Норовын Алтанхуягийг тус намаас Ерөнхийлөгчийн сонгуульд нэр дэвшихийг дэмжсэн байна. Ингэснээр О.Цогтгэрэлийн даргалж буй Ардчилсан намаас Ерөнхий сайд асан Н.Алтанхуяг нэр дэвшихээр болж байгаа юм.
МОНГОЛ АРДЫН НАМААС ЕРӨНХИЙЛӨГЧИЙН СОНГУУЛЬД НЭР ДЭВШИГЧИД
МАН-ын Удирдах Зөвлөл хуралдаж, Ерөнхийлөгчийн сонгуульд намын дарга У.Хүрэлсүхийг 100 хувийн саналаар нэр дэвшихээр дэмжлээ. Энэхүү саналыг МАН-ын Бага хурлаар эцэслэн шийдвэрлэгдэнэ.
МАН-ын Бага хурлаар Ерөнхийлөгчид нэр дэвшигчийг хэлэлцэн МАН-ын дарга У.Хүрэлсүхийг 100 хувийн саналаар буюу Бага хуралд оролцсон 261 гишүүн дэмжиж, нэр дэвшүүлэхээр болов.
ЗӨВ ХҮН ЭЛЕКТОРАТ ЭВСЭЛЭЭС ЕРӨНХИЙЛӨГЧИЙН СОНГУУЛЬД НЭР ДЭВШИГЧИД
“Зөв ХҮН электорат”-ын зүгээс эдийн засагч Д.Жаргалсайхан, нийтлэлч Баабар буюу Б.Батбаяр, “Датаком”-ын Д.Энхбат, “Сонгдо” эмнэлгийн ерөнхий захирал Б.Болдсайхан, УИХ-ын гишүүн асан Ц.Оюунгэрэл нарын таван хүнд тус эвслээс Ерөнхийлөгчийн сонгуульд нэрээ дэвшүүлэх хүсэлтийг албан ёсоор тавьжээ. Одоогоор Д.Жаргалсайхан татгалзсан хариу өгсөн байна.
Б.Болдсайхан Хөдөлмөрийн Үндэсний Намаас тавьсан саналыг хүлээн авч Ерөнхийлөгчийн сунгаанд өрсөлдөх болсоноо мэдэгдээд буй.
Мөн Д.Энхбат уг хүсэлтийг хүлээн авч буйгаа сошиалаар мэдэгджээ. Тэрбээр “Дангаасүрэнгийн Энхбат би Ерөнхийлөгчийн ээлжит сонгуульд “Зөв ХҮН электорат” эвслээс нэр дэвшихийг зөвшөөрч байна” гэжээ.
УИХ-ын гишүүн асан Б.Батбаяр (Баабар) нар мөн эвслийн саналыг хүлээн авсан юм.
