Их Британийн хатан хаан Элизабет II-ийн нөхөр, Эдинбургийн гүн Филипп өнгөрсөн баасан гаригт 99 насандаа таалал төгссөн байна. Энэ талаар Букингeмийн ордноос мэдээлжээ. Түүний лагшин гуравдугаар сард тавгүйрхэж эмнэлэгт хэвтэн эмчлүүлж байв. Эдинбургийн гүн таалал төгссөнтэй холбогдуулан улс даяар төрийн далбааг бөхийлгөж, гашуудал зарлажээ. Түүнийг оршуулах ёслол Виндзор цайз дахь Гэгээн Жоржийн сүмд ирэх бямба гаригт болно. Энэ үеэр олон нийтийг хамарсан үйл ажиллагаа зохион байгуулахгүй юм байна.
Цар тахлын улмаас хатан хааны ордны гадаа олноор цугларахгүй, цэцэг тавихгүй байхыг хатан хааны гэр бүлээс хүсчээ. Мөн цэцгийн баглаа худалдан авахын оронд буяны байгууллагад хандив өргөхийг зөвлөсөн байна. Ковидын халдварын тархалтыг хянахад чиглэсэн хязгаарлалтын дагуу оршуулах ёслолд оролцох хүний тоог 30 байхаар хязгаарлажээ. Букингeмийн ордны мэдээлснээр хааны гэр бүлийн гишүүний үүргээсээ татгалзсан, одоо АНУ-ын Лос-Анжeлeс хотноо амьдарч буй хунтайж Харри өвөөгийнхөө оршуулгын ёслолд оролцохоор төлөвлөж байна. Харин хөл хүндтэй гэргий Мегалийг эмч нь хилийн чанад руу зорчихгүй байхыг зөвлөжээ.
Гүн Филипп 1939 онд тэнгисийн цэргийн коллeжид орсон. Төд удалгүй тэрбээр ирээдүйн хань болох Элизабеттай хамаатных нь хурим дээр танилцсан түүхтэй. Тэд хамтдаа 70 гаруй жил амьдарч дөрвөн хүүхэд өсгөсөн. Мөн зургаан ач зээ, дөрвөн гучтай юм байна.
Д.ЦЭРЭНДОЛГОР