Сүүлийн долоон жилийн турш хамгийн олон тэрбумтантай хотоор АНУ-ын Нью-Йорк нэрлэгдэж байв. Форбэс сэтгүүл жил бүр тэрбумтнуудын жагсаалтыг гаргадаг уламжлалтай. Энэ удаагийн жагсаалтаар 100 тэрбумтантай Бээжин хотыг ийн онцолсон байна. Өнгөрсөн онд Хятадад шинээр 33 тэрбумтан төрөн гарчээ. Дээрх сэтгүүлийн онцолсноор дэлхийн хамгийн олон тэрбумтантай 10 хотын тав нь Хятадад байна гэсэн байна. Тодруулбал, Бээжин хотоос гадна Хонконг 80, Шэнжэн 68, Шанхай 64 тэрбумтан тус тус амьдарч байна.
Жагсаалтын хоёрдугаарт Нью-Йоркт өнгөрсөн оны байдлаар шинээр долоон тэрбумтан төрж, энэ тоо 99-д хүрчээ. Форбэс сэтгүүлийн цохон дурдсанаар Бээжин хотноо 21 сая, Нью-Йоркт 8.4 сая хүн амьдардаг. Мөн Нью-Йорк нь Бээжинтэй харьцуулахад 40 хувьтай нь тэнцэх газар нутагтай юм байна. Өнгөрсөн онд дэлхий даяар 660 тэрбумтан шинээр төрж, нийт тэрбумтнуудын тоо 2755-д хүрчээ. Тэдгээрийн нийт хөрөнгө 13.1 их наяд ам.доллар аж. Мэргэжилтнүүдийн онцолж буйгаар цар тахлын улмаас баян хоосны ялгаа улам ихсэх болсон. АНУ-д гэхэд цар тахлаас үүдэн 80 сая иргэн ажилгүй болж, найман сая иргэн ядуурлын эгнээнд шилжжээ.
Д.ЦЭРЭНДОЛГОР