Өнөөдөр УОК-ын хурал Төрийн ордонд 14:00 цагаас хуралдана. Хуралдаанаар халдварын нөхцөл байдал ХӨСҮТ, ЭМЯ-наас хүргүүлсэн саналыг хэлэлцэх юм.
Коронавируст халдварыг илрүүлэхээр сүүлийн 24 цагт улсын хэмжээнд хийсэн шинжилгээний хариуг ХӨСҮТ-өөс танилцуулах үеэр ХӨСҮТ-ийн дэд захирал Э.Тэмүүлэн “Халдварт өвчин судлалын үндэсний төв, Эрүүл мэндийн яамнаас халдварын энэ тархалтыг их гарч байгаатай холбогдуулан Улсын Онцгой комисст маш тодорхой саналуудыг хэд хэдэн хувилбараар гаргана явуулж байна. Боломжтой бол хамгийн үр дүнтэй арга нь бүх нийтийн хөл хориог тогтоох юм. Ялангуяа хоёр нууц үеийн хугацаанаас дээш буюу 28 хоногоор тогтоох нь хамгийн үр дүнтэй арга гэдэг нь нотлогдсон. Хэрвээ ийм арга байхгүй гэвэл бид маш тодорхойгоор үйлчилгээний байгууллагуудын ажиллах цагийг багасгах, нэг дор 10-аас дээш хүн цугларахыг хориглох, 10-аас дээш хүн заавал цугларах шаардлагатай байгаа бол цахим хэлбэрээр арга хэмжээгээ зохион байгуулах хэрэгтэй. Мөн халдвар ихээр тархах эрсдэлтэй фитнесс, караоке, баар, ресторан зэрэг газруудын үйл ажиллагааг 14-өөс 21 хоног түр зогсоох гэх мэт тодорхой саналуудыг бол салбарын зүгээс хүргэсэн байгаа” гэсэн.
Мөн Эрүүл мэндийн яамнаас гаргасан нийслэлд 28 хоногийн хөл хорио тогтоох саналыг УОК-ын Шуурхай ажлын хэсгийн өчигдрийн хуралдаанаар дэмжээгүй юм.