Монголын үндэсний олимпын хороо түүхт 65 жилийн ойн шинэ логогоо танилцууллаа. 1956 оны хоёрдугаар сарын 26-нд үүсгэн байгуулагдсан тус хороо нь зуны 13, өвлийн 14 олимпод баг тамирчдаа илгээсэн түүхтэй.
Монгол Улс түүхэндээ олимпын наадмын 26 медальтай бөгөөд бүгдийг нь зуны олимпын наадмын жүдо, чөлөөт бөх, бокс, буудлага зэрэг төрлүүдээс хүртэж байв. Харин хамгийн өндөр амжилт үзүүлсэн олимп нь 2008 оны Бээжингийн олимп бол хамгийн олон тамирчид медаль хүртсэн нь 2012 оны Лондонгийн олимп билээ. Монголчууд Бээжингийн олимпоос хоёр алт, хоёр мөнгөн медаль хүртэж, багийн дүнгээрээ 31 дүгээр байрт шалгарч байсан бол Лондонгийн олимпоос хоёр хүрэл, гурван хүрэл медаль хүртэж багийн дүнгээрээ 56 дугаар байрт шалгарсан билээ.
Өдгөө Монголын үндэсний олимпын хороог олимпын алт, мөнгөн медальт Н.Түвшинбаяр удирдаж буй.
Хамгийн сүүлд 2016 оны Рио Де Жанейрогийн зуны олимпод Монгол Улс спортын есөн төрөлд 43 тамирчнаа илгээж, нэг мөнгө, нэг хүрэл медаль хүртэж байв.
Харин 2018 оны Пёнчаны өвлийн олимпод хоёр тамирчнаа илгээсэн.
Одоогоор Монгол Улсын 11 баг тамирчид байт харваа, бокс, буудлага, усан сэлэлт, чөлөөт бөх, 3х3 сагсан бөмбөг зэрэг төрөлд “Токио-2020” зуны олимпын наадамд оролцох эрхээ аваад байна.