Якутад энэ жил хамгийн хүйтэн өвөл болж байна. Сүүлийн 2 сарын турш энд цельсийн –40 хэм хүрч байгаа бол заримдаа агаарын хэм -50 хэмд хүрч байна. Цаг уурчид энэ сарын эцэс хүртэл хүйтний эрч улам чангарахыг анхааруулж байна.
Тодруулбал, энэ бүс нутагт цаг агаар -60 хэм хүрч хүйтрэхийг урьдчилан анхаарууллаа. Якутын хүн ам аль болох орон гэр, албан байраа дулаалахыг хичээж байна. Олон дүүрэгт сургууль цэцэрлэгийн хичээлийг ч хаагаад байна. Якутад цаг агаар өвөлдөө эрс хүйтэн байдаг. Гэвч 2006 оноос эхэлж сүүлийн 14 жилийн туршид энэ жилийнх шиг эрс хүйтэрч байгаагүй аж. Хүйтний эрч эрс чангарахад хамгийн ихээр хүндрэл бэрхшээл амсдаг хүмүүс нь автомашин эзэмшигчид байдаг аж. Жолооч нар цаг агаарын хэмийг мэдэрч автоматаар асдаг төхөөрөмж суурилуулж байгаагийн дээр Наташа гэж нэрийдэх болсон тусгай хучилгаар машинаа дулаалдаг байна.